കോഴിക്കോട്: ഇന്ത്യയില്‍ നിരോധനമേര്‍പ്പെടുത്തിയ ഐ.എസ്.ഐ.എസ് പതാകകളുമായി ബജ്‌റംഗ്ദള്‍ പ്രവര്‍ത്തകര്‍ പരസ്യമായി തെരുവുകളില്‍. ഐ.എസിന്റെ പതാകകള്‍ പരസ്യമായി തെരുവുകളില്‍ കൊണ്ടുവന്ന് കത്തിക്കുകയും വീഡിയോകളും ചിത്രങ്ങളും സാമൂഹ്യമാധ്യമങ്ങളില്‍ ഷെയര്‍ ചെയ്യുകയുമുണ്ടായി.

ജനം ടി.വിയില്‍ നല്‍കിയ വ്യാജവാര്‍ത്തയെ പിന്‍തുടര്‍ന്നാണ് ബജ്‌റംഗ്ദളിന്റെ പരിപാടി. വര്‍ക്കല സി.എച്ച് മുഹമ്മദ് കോയ കോളജില്‍ മാസങ്ങള്‍ക്കു മുന്‍പ് നടന്ന കോളജ് ഡേ പരിപാടിയുടെ ദൃശ്യങ്ങള്‍ നല്‍കിയാണ് ജനം ടി.വി വ്യാജ വാര്‍ത്ത നല്‍കിയത്. വാര്‍ത്തയ്‌ക്കെതിരെ സാമൂഹ്യമാധ്യമങ്ങളില്‍ വന്‍ പ്രതിഷേധവും ട്രോളുകളും വരുന്നുണ്ടെങ്കിലും അതിന്റെ ചുവടുപിടിച്ച് പ്രതിഷേധമെന്ന പേരില്‍ ഐ.എസിന്റെ പതാകകള്‍ വ്യാപകമായി ഉണ്ടാക്കി കത്തിക്കുകയാണ് രാഷ്ട്രീയ ബജ്‌റംഗ്ദള്‍ പ്രവര്‍ത്തകര്‍.

തിരുവനന്തപുരം നഗരത്തിലും തൃശൂരിലുമാണ് വ്യാപകമായി കൊടികള്‍ കത്തിച്ചത്. ഇതിന്റെ വീഡിയോകളും ചിത്രങ്ങളും ഇവര്‍ തന്നെ ഷെയര്‍ ചെയ്തിട്ടുണ്ട്. കേരളത്തിലുടനീളം ഐ.എസിന്റെ പതാകകള്‍ കത്തിക്കണമെന്നും ഇവര്‍ ആഹ്വാനം ചെയ്യുന്നുണ്ട്. ഇവര്‍ക്ക് എവിടെ നിന്നാണ് പതാകകള്‍ ലഭിക്കുന്നതെന്നും ആരാണ് നിര്‍മിക്കുന്നതെന്നും അന്വേഷിക്കണമെന്ന ആവശ്യമുയര്‍ന്നിരിക്കുകയാണിപ്പോള്‍.

2018 മെയില്‍ അസമിലെ നല്‍ബാരി ജില്ലയില്‍ പൊതുസ്ഥലത്ത് ഐ.എസ് പതാക തൂക്കിയ സംഭവത്തില്‍ ആറു ബി.ജെ.പി പ്രവര്‍ത്തകര്‍ അറസ്റ്റിലായിരുന്നു. കൈഹാത്തിയിലെ തപന്‍ ബര്‍മന്‍, ബെല്‍സോര്‍ സ്വദേശികളായ വിപ്‌ജ്യോതി കത്തൂരിയ, സൊറൊ ജ്യോതി ബൈശ്യ, പുലക് ബര്‍മന്‍ തുടങ്ങിയവരാണ് അറസ്റ്റിലായത്.

2015 ഫെബ്രുവരിയിലാണ് ഇന്ത്യയില്‍ ഐ.എസിനെ നിരോധിച്ചത്. അണ്‍ലോഫുള്‍ ആക്ടിവിറ്റീസ് (പ്രിവെന്‍ഷന്‍) ആക്ട് (1967) പ്രകാരമായിരുന്നു ഈ നിരോധനം. തീവ്രവാദ സംഘടകളുമായി ബന്ധപ്പെട്ട ഏത് വസ്തുക്കളും കൈവശം വയ്ക്കുന്നത് കുറ്റകരമാണെന്ന് ആക്ടില്‍ പറയുന്നുണ്ട്.