ടെക്‌സസ്: കൃഷിയിടത്തിലെ ഷെഡില്‍ കണ്ടെത്തിയത് 30ല്‍ അധികം വിഷപ്പാമ്പുകളെ. അമേരിക്കയിലെ ഗോര്‍മനില്‍ ബോബി കോവന്‍ എന്ന വ്യക്തിയുടെ കൃഷിയിടത്തിലെ ആലയില്‍ ചൊവ്വാഴ്ചയാണ് സംഭവം. റാറ്റില്‍ സ്‌നേക്‌സ് എന്നറിയപ്പെടുന്ന പാമ്പുകളെയാണ് കൂട്ടത്തോടെ കാണാനായത്.

കോവനും അദ്ദേഹത്തിന്റെ സുഹൃത്തും ഒരു ചെറിയ പാമ്പ് ഇഴഞ്ഞു നീങ്ങുന്നത് ശ്രദ്ധയില്‍പ്പെടുകയും അതിനെ പുറത്തുകളയാന്‍ ഉപകരണമെടുക്കുന്നതിനിടെ അതിനടിയില്‍ ഡസണുകളോളം വിഷപ്പാമ്പുകള്‍ പതുങ്ങിയിരിക്കുന്നത് കാണുകയുമായിരുന്നു.

'എന്തുപറയണമെന്ന് ഞങ്ങള്‍ക്കറിയില്ല, ഞങ്ങള്‍ അദ്ഭുതപ്പെട്ടുപോയി, ഞങ്ങള്‍ ആ ഉപകരണം എടുത്തുയര്‍ത്തുന്നതിനിടെ പെട്ടെന്നത് താഴേക്കിടുകയായിരുന്നു. കാരണം അതിനടിയില്‍ നിരവധി പാമ്പുകളുണ്ടായിരുന്നു' കോവന്‍ പറഞ്ഞു.

പേടിയുളളവര്‍ കാണരുതെന്ന അടിക്കുറിപ്പോടെ പാമ്പുകളുടെ വീഡിയോ സോഷ്യല്‍ മീഡിയയില്‍ വൈറലായിട്ടുണ്ട്.