ദുബൈ: ലങ്കയ്‌ക്കെതിരായ ടെസ്റ്റ് പരമ്പര തൂത്തുവാരിയതിന് പിന്നാലെ ഇന്ത്യന്‍ താരങ്ങള്‍ക്ക് റാങ്കിങില്‍ മുന്നേറ്റം. ഓപണര്‍ ലോകേഷ് രാഹുല്‍, ചേതേശ്വര്‍ പുജാര, വിരാട് കോഹ്‌ലി, അജിന്‍ക്യ രഹാനെ എന്നിവര്‍ക്കൊപ്പം ആദ്യ പത്തില്‍ ഇടംപിടിച്ചിട്ടുണ്ട്.
രണ്ടു സ്ഥാനം മെച്ചപ്പെടുത്തിയ രാഹുല്‍ ഒന്‍പതാം സ്ഥാനത്താണ്. ടെസ്റ്റില്‍ തുടര്‍ച്ചയായ ഏഴു അര്‍ധസെഞ്ച്വറികള്‍ നേടി വമ്പന്‍ താരങ്ങളുടെ റെക്കോര്‍ഡിനൊപ്പമെത്താന്‍ പരമ്പരയിലെ മൂന്നാം ടെസ്റ്റില്‍ രാഹുലിന് സാധിച്ചു. ശിഖര്‍ ധവാനൊപ്പം 188 റണ്‍സിന്റെ ഓപണിങ് കൂട്ടുകെട്ടുണ്ടാക്കാനും രാഹുലിന് സാധിച്ചു. അതേസമയം ഇതേ മത്സരത്തില്‍ സെഞ്ച്വറി നേടിയ ശിഖര്‍ ധവാന്‍ പത്തു സ്ഥാനങ്ങള്‍ മെച്ചപ്പെടുത്തി 28ാം റാങ്കിലേക്കുയര്‍ന്നു. 358 റണ്‍സോടെ പരമ്പരയുടെ താരമാകാനും ധവാന് സാധിച്ചിരുന്നു.
ഓള്‍റൗണ്ടര്‍ ഹര്‍ദിക് പാണ്ഡ്യ 45 സ്ഥാനം മെച്ചപ്പെടുത്തി 68ാം റാങ്കില്‍ ഇടംപിടിച്ചു. മൂന്നാം ടെസ്റ്റില്‍ വെടിക്കെട്ട് ബാറ്റിങിലൂടെ സെഞ്ച്വറി നേടാന്‍ പാണ്ഡ്യക്ക് സാധിച്ചിരുന്നു. ഓള്‍റൗണ്ടിങ് റാങ്കിങില്‍ ഇന്ത്യന്‍ താരം രവീന്ദ്ര ജഡേജയ്ക്ക് ഒന്നാം സ്ഥാനം നഷ്ടമായി. ബംഗ്ലാദേശ് താരം ഷാകിബ് അല്‍ഹസന്‍ വീണ്ടും ഒന്നാം സ്ഥാനത്ത് തിരിച്ചെത്തി. എന്നാല്‍ ബൗളര്‍മാരുടെ പട്ടികയില്‍ താരം ഒന്നാം സ്ഥാനത്തുണ്ട്.