കുറ്റ്യാടി: കാര്‍ഷികവൃത്തിയില്‍ മനസും ശരീരവും അര്‍പ്പിച്ച് പാട്ടകൃഷിയില്‍ നൂറ് മേനി കൊയ്ത് മാതൃകയാവുകയാണ് കുറ്റ്യാടി ഊരത്തെ ഒലവത്തുങ്കല്‍ അശോകന്‍. സ്വന്തമായുള്ള ഒരേക്കര്‍ ഭൂമിക്ക്പുറമേ പ്രദേശത്ത് തരിശായിക്കിടക്കുന്ന മൂന്ന് ഏക്കര്‍ ഭൂമി കൂടി പാട്ടത്തിനെടുത്ത് നെല്‍കൃഷിക്ക് പുറമെ വിവിധ കാര്‍ഷിക വിളകള്‍ കൃഷി ചെയ്താണ് അശോകന്‍ പുതിയ തലമുറക്ക് മാതൃകയാവുന്നത്.
കൃഷി നഷ്ടമാണെന്ന് മുന്‍വിധിയോടെ കാണുന്നവര്‍ക്ക് നല്ല മറുപടിയും കൊടുക്കാനുണ്ട് ഈ കര്‍ഷകന്. സ്ഥലത്തേക്കാള്‍ ഉപരി ഉറച്ച മനസുണ്ടെങ്കില്‍ ഏത് കൃഷിയും വിജയിപ്പിക്കാനാവുമെന്ന് ഈ കര്‍ഷകന്‍ വിശ്വസിക്കുന്നു. തരിശായി കിടന്ന നെല്‍പ്പാടങ്ങള്‍ പാട്ടത്തിനെടുത്താണ് ഇയാള്‍ കൃഷിയിറക്കുന്നത്.
മണ്ണിനെ അറിഞ്ഞ് കൃഷിയിറക്കുന്ന അശോകന്റെ കൃഷിയിടത്തില്‍ നെല്ലിനു പുറമേ പച്ചക്കറികളും പഴ വര്‍ഗങ്ങളും നട്ടുവളര്‍ത്തുന്നു.
നെല്‍കൃഷിക്ക് നാടന്‍ വിത്തുകള്‍ ഉപയോഗിക്കുന്ന ഈ കര്‍ഷകന്‍ തികച്ചും ജൈവമാര്‍ഗമാണ് അവംലംബിക്കുന്നത്.
ചാണകവും ആട്ടിന്‍ കാഷ്ഠവും കോഴിവളവും ഉപയോഗിക്കുന്നതിന് പുറമെ ജൈവ കീടനാശിനികളും ആവശ്യാനുസരണം ഉപയോഗപ്പെടുത്തുന്നുണ്ട്. കാര്‍ഷിക വൃത്തിക്ക് പുറമെ പശു, ആട് വളര്‍ത്തലിലും മികച്ച നേട്ടമാണ് അശോകന്‍ ഉണ്ടാക്കുന്നത്. അവിവാഹിതനായ അശോകന്റെ മുഖ്യ വരുമാന മാര്‍ഗവും കൃഷിയാണ്.
കുറ്റ്യാടി ചന്തയിലാണ് കാര്‍ഷികവിളകള്‍ വില്‍ക്കുന്നത്. കാര്‍ഷികവൃത്തിയോടുള്ള അര്‍പ്പണത്തിന് പഞ്ചായത്തിലെ മികച്ച നെല്‍കര്‍ഷകനുള്ള അവാര്‍ഡ് അശോകന് ലഭിച്ചിരുന്നു. സ്റ്റേറ്റ് ബാങ്കിന്റെ ആദരവും ഈ കര്‍ഷകന് ലഭിച്ചിട്ടുണ്ട്. ഊരത്ത് പാടശേഖര സമിതിയില്‍ അംഗം കൂടിയാണ് അശോകന്‍.