കൊല്‍ക്കത്ത: മുഖ്യമന്ത്രി മമത ബാനര്‍ജിക്ക് കരുത്തു പകര്‍ന്ന് പശ്ചിമ ബംഗാള്‍ മുനിസിപ്പല്‍ കോര്‍പ്പറേഷന്‍ തെരഞ്ഞെടുപ്പ് ഫലം. ഏഴ് കോര്‍പ്പറേഷനുകളിലേക്ക് നടന്ന തെരഞ്ഞെടുപ്പില്‍ സമ്പൂര്‍ണമെന്ന് അവകാശപ്പെടാവുന്ന വിജയമാണ് തൃണമൂല്‍ നേടിയത്. ഏഴിടത്തും അധികാരം പിടിച്ച തൃണമൂല്‍ രണ്ട് കോര്‍പറേഷനുകളിലെ എല്ലാം വാര്‍ഡുകളിലും വിജയിച്ചു.

ബുനിയാദ്പൂരിലെ 14 വാര്‍ഡുകളില്‍ 13 തൃണമൂലിനൊപ്പം നിന്നു. ബി.ജെ.പിയാണ് ശേഷിച്ച വാര്‍ഡില്‍ വിജയിച്ചത്. 12 വാര്‍ഡുകളുള്ള കൂപ്പേഴ്‌സ് ക്യാമ്പ് കോര്‍പറേഷനിലെ എല്ലാ വാര്‍ഡിലും തൃണമൂല്‍ വിജയക്കൊടി പാറിച്ചു.

ദുര്‍ഗാപൂര്‍ കോര്‍പറേഷനിലെ വോട്ടെണ്ണല്‍ പുരോഗമിക്കുമ്പോള്‍ തൃണമൂല്‍ വിജയം ഉറപ്പിച്ചു. 43 വാര്‍ഡുകളില്‍ ഫലം അറിവായ 27 വാര്‍ഡുകളിലും വിജയം തൃണമൂലിനാണ്.

നല്‍ഹാട്ടിയില്‍ 16 വാര്‍ഡുകളില്‍ 14 ഇടത്തും തൃണമൂല്‍ വിജയിച്ചപ്പോള്‍ ഒരു സീറ്റിലാണ് ഇടതുപക്ഷം വിജയിച്ചത്.

പന്‍സ്‌കുരയിലെ 18 വാര്‍ഡുകളില്‍ 17 ഉം ധൂപ്ഗുരിയിലെ 16 വാര്‍ഡുകളില്‍ 12 ഉം തൃണമൂലിന്റെതായി.

ഇടതുപക്ഷത്തിന്റെ കോട്ടകളാണ് പലയിടത്തും തകര്‍ന്നു വീണത്.