കൊണ്ടോട്ടി: ആരോഗ്യ ബോധവല്‍ക്കരണത്തിന്റെ ഭാഗമായി കൊട്ടുക്കര പി.പി.എം ഹയര്‍ സെക്കന്‍ഡറി സ്‌കൂള്‍ വിദ്യാര്‍ഥികള്‍ അവതരിപ്പിച്ച പാട്ടുവണ്ടിയും തെരുവ് നാടകവും ശ്രദ്ധേയമായി. മാലിന്യ സംസ്‌കരണം, രോഗ പ്രതിരോധ പ്രവര്‍ത്തനങ്ങള്‍ തുടങ്ങിയവ ലക്ഷ്യംവച്ചാണ് വിദ്യാര്‍ഥികള്‍ സ്വാതന്ത്ര്യദിനത്തില്‍ പാഠം ഒന്ന് ആരോഗ്യം എന്ന വിഷയത്തില്‍ പാട്ടുവണ്ടിയും തെരുവ് നാടകവുമായി രംഗത്തെത്തിയത്.
അറബിക് അധ്യാപിക പി.റസിയയാണ് പാട്ടുവണ്ടിയില്‍ ആലപിച്ച ഗാനങ്ങള്‍ രചിച്ചത്. പി.സ്‌നേഹ, അല്‍അമീന്‍, നൗറിന്‍, ഷാക്കിബ്, ഹൃദ്യ തുടങ്ങിയവര്‍ ഗാനങ്ങള്‍ ആലപിച്ചു.
വിവിധ കേന്ദ്രങ്ങളില്‍ നാടകവും പാട്ടുവണ്ടിയുമെത്തി. ലുഖ്മാന്‍ മൊറയൂരാണ് നാടകം രചിച്ചത്. പരിപാടിയുടെ ഉദ്ഘാടനം മന്ത്രി എ.കെ ബാലന്‍ നിര്‍വഹിച്ചു. പി.ഉബൈദുല്ല എം.എല്‍.എ അധ്യക്ഷനായി.ആരോഗ്യ കൈപുസ്തക ജില്ലാ മെഡിക്കല്‍ ഓഫിസര്‍ ഡോ.സക്കീന സ്‌കൂള്‍ മാനേജര്‍ എം.അബൂബക്കര്‍ ഹാജിക്ക് നല്‍കി പ്രകാശനം ചെയ്തു.പാട്ടുവണ്ടി ഫ്‌ളാഗ് ഓഫ് ഡെപ്യൂട്ടി കലക്ടര്‍ അരുണ്‍ സി വിജയന്‍ നിര്‍വഹിച്ചു. അഡ്വ.കെ.കെ ഷാഹുല്‍ ഹമീദ്, സി.എം അബ്ദുല്‍ ബഷീര്‍, ടി.കെ അബ്ദുല്‍ റസാഖ് സംസാരിച്ചു.
വിവിധ സ്ഥലങ്ങളില്‍ നടന്ന സ്വീകരണത്തില്‍ സി.എച്ച് ജമീല, വി.പി സുമയ്യ, കെ.സലാം മാസ്റ്റര്‍, ബാലത്തില്‍ ബാപ്പു, സെറീന ഹസീബ് സംസാരിച്ചു.സമാപനം കൊണ്ടോട്ടിയില്‍ ടി.വി ഇബ്രാഹീം എം.എല്‍.എ ഉദ്ഘാടനം ചെയ്തു.