കാസര്‍കോട്: കേരളാ ബ്ലാസ്റ്റേഴ്‌സ് ഫുട്‌ബോള്‍ സ്‌കൂള്‍ ക്യാംപ് ജില്ലാതല ഉദ്ഘാടനത്തിനായി ബ്ലാസ്റ്റേഴ്‌സ് അസിസ്റ്റന്റ് കോച്ച് താങ്‌ബോയ് സിങ്‌തോയും ഷൈജു ദാമോദരനും ഇന്നു കാസര്‍കോടെത്തും. ഐ.എസ്.എല്‍ ടീം കേരളാ ബ്ലാസ്റ്റേഴ്‌സ് എഫ്.സി, കേരള ഫുട്‌ബോള്‍ അസോസിയേഷന്റെയും സ്‌കോര്‍ലൈന്‍ മാനേജ്‌മെന്റ് ഗ്രൂപ്പിന്റെയും സഹകരണത്തോടെ ആരംഭിക്കുന്ന ഫുട്‌ബോള്‍ സ്‌കൂളിന്റെ ജില്ലാതല ഉദ്ഘാടനത്തിന് ഒട്ടേറെ പ്രമുഖര്‍ പങ്കെടുക്കും. കേരള ബ്ലാസ്റ്റേഴ്‌സ് അസിസ്റ്റന്റ് കോച്ചും ടെക്‌നിക്കല്‍ ഡയറക്ടറുമായ താങ് ബോയ്‌സിങ് തോ, പ്രമുഖ മലയാളം കമേന്ററേറ്റര്‍ ഷൈജു ദാമോദരന്‍ എന്നിവര്‍ക്കു പുറമെ കെ.എഫ്.എ ടെക്‌നിക്കല്‍ ഡയറക്ടര്‍ മില്‍ട്ടന്‍ ആന്റണി, കെ.എഫ്.എ ഭാരവാഹികള്‍, ഫുട്‌ബോള്‍ താരങ്ങള്‍ തുടങ്ങി നിരവധി പ്രമുഖരാണ് ഉദ്ഘാടന ചടങ്ങില്‍ സംബന്ധിക്കാന്‍ എത്തുന്നത്.
ഇന്നു വൈകുന്നേരം മൂന്നിന് കാസര്‍കോട് മുനിസിപ്പല്‍ സ്റ്റേഡിയത്തിലാണ് ഉദ്ഘാടന ചടങ്ങ്. ജില്ലയിലെ മുഴുവന്‍ ബ്ലാസ്റ്റേഴ്‌സ് ഫുട്‌ബോള്‍ സ്‌കൂളിലേയും കുട്ടിതാരങ്ങള്‍ പങ്കെടുക്കും.