കൊണ്ടോട്ടി: ബോള്‍ പേനയില്‍ നിന്ന് സ്വാതന്ത്ര്യം എന്ന മുദ്രാവാക്യവുമായി ഒഴുകൂര്‍ ജി.എം.യു.പി സ്‌കൂളില്‍ മഷിത്തണ്ട് പരിപാടിക്ക് തുടക്കമായി.ഉപയോഗശേഷമുള്ള വലിച്ചെറിയല്‍ സംസ്‌കാരത്തിന് അറുതിവരുത്തുകയെന്ന ഉദ്ദേശ്യത്തോടെയാണ് പദ്ധതി നടപ്പാക്കുന്നത്. സംസ്ഥാന സര്‍ക്കാര്‍ നടപ്പാക്കുന്ന മാലിന്യത്തില്‍ നിന്ന് സ്വാതന്ത്ര്യം പരിപാടിയുടെ ചുവടുപിടിച്ചാണ് മഷിത്തണ്ട് പദ്ധതി. മൊറയൂര്‍ അലിവ് സാംസ്‌കാരിക വേദിയുടെ സഹകരണത്തോടെയാണ് പദ്ധതിക്ക് ആവശ്യമായ പേനകള്‍, മഷി, തുടങ്ങിയവ എത്തിക്കുന്നത്.
മൊറയൂര്‍ പഞ്ചായത്ത് പ്രസിഡന്റ് കെ.എം സലീം ഉദ്ഘാടനം ചെയ്തു. പി.ടി.എ പ്രസിഡന്റ് കെ.ജാബിര്‍ അധ്യക്ഷനായി. പ്രധാനാധ്യാപകന്‍ അബ്ദു വിലങ്ങപ്പുറം, കോഡിനേറ്റര്‍ ആര്‍.കെ ദാസ്, എസ്.എം.സി ചെയര്‍മാന്‍ കെ.സി അബ്ബാസ്, എന്‍.കെ ഫഹദ്, കെ.വി ബാപ്പു, കെ.മൊയ്തീന്‍കുട്ടി, എം.ടി മൊയ്തീന്‍കുട്ടി സംസാരിച്ചു.