കൊടുങ്ങല്ലൂര്‍: പടിഞ്ഞാറെ വെമ്പല്ലൂര്‍ എം.ഇ.എസ് അസ്മാബി കോളജില്‍ വിദ്യാര്‍ഥി സംഘര്‍ഷത്തിനിടയില്‍ കോളജ് അടിച്ച് തകര്‍ത്ത കേസില്‍ 16 പേരെ മതിലകം പൊലിസ് അറസ്റ്റ് ചെയ്തു.
പൊതുമുതല്‍ നശിപ്പിച്ചതിന് പി.ഡി.പി.പി ആക്ട് പ്രകാരം ജാമ്യമില്ലാ വകുപ്പ് ചുമത്തിയാണ് അറസ്റ്റ്. ഈ കേസില്‍ ഇക്കഴിഞ്ഞ പതിനാറാം തിയതി സ്റ്റേഷനില്‍ ഹാജരായ ഇവരെ ജാമ്യത്തില്‍ വിട്ടയച്ചിരുന്നു. എന്നാല്‍ പിന്നീട് നിയമോപദേശം തേടിയ ശേഷം കേസില്‍ പുതിയ വകുപ്പ് കൂട്ടിച്ചേര്‍ക്കുകയായിരുന്നു. തുടര്‍ന്ന് പ്രതികളെ സ്റ്റേഷനില്‍ വിളിച്ചു വരുത്തി അറസ്റ്റ് ചെയ്തു.
കോളജ് വിദ്യാര്‍ഥികളായ മുഹമ്മദ് ഷാലത്ത് (20), മുഹമ്മദ് മുഹ്‌സിന്‍ (20), രാഹുല്‍ (18), അനൂപ് (19), മുഹമ്മദ് ഷോഹിബ് (20), മുഹമ്മദ് റിമല്‍ഷ (20), സയ്ദ് തൗഫീക്ക് തങ്ങള്‍ (20), നാസിം(19), മുഹമ്മദ് സബീല്‍ (19), വിപിന്‍ (19), ഫയാസ് (21), ഷബാസ് (21), മുഹമ്മദ് സാലിഹ്(21), ഇഷാം നജീബ് (20), അര്‍ജുന്‍ (20), ഷഹ്‌സാദ് (20) ആണ് അറസ്റ്റിലായത്.
അന്‍പത് പ്രതികളുള്ള കേസില്‍ ഇനിയും 34 പേരെ പിടികൂടാനുണ്ട്. ഇക്കഴിഞ്ഞ പതിനാലാം തിയതിയാണ് എം.ഇ.എസ് അസ്മാബി കോളജില്‍ വിദ്യാര്‍ഥി അക്രമം അരങ്ങേറിയത്.കോളജ് യൂനിയന്‍ തെരഞ്ഞെടുപ്പുമായി ബന്ധപ്പെട്ട് കാംപസില്‍ വിദ്യാര്‍ഥികള്‍ ഏറ്റുമുട്ടിയിരുന്നു.
ഇതേ തുടര്‍ന്ന് കോളജില്‍ പൊലിസ് നടത്തിയ ലാത്തിച്ചാര്‍ജില്‍ പ്രതിഷേധിച്ച് വിദ്യാര്‍ഥികള്‍ നടത്തിയ പ്രകടനമാണ് അക്രമത്തില്‍ കലാശിച്ചത്. പ്രിന്‍സിപ്പലുമായി നടത്തിയ ചര്‍ച്ച പരാജയപ്പെട്ടതിനെ തുടര്‍ന്ന് അക്രമാസക്തരായ വിദ്യാര്‍ഥികള്‍ ക്ലാസ് മുറികള്‍ ഉള്‍പ്പടെ അടിച്ചു തകര്‍ക്കുകയായിരുന്നു.