ന്യൂഡല്‍ഹി: ഓഗസ്റ്റ് 15ന് ലഡാക്ക് മേഖലയില്‍ ഇന്ത്യ-ചൈന സൈനികര്‍ തമ്മിലുണ്ടായ ഏറ്റുമുട്ടലിന്റെ ദൃശ്യം പുറത്ത്. ലഡാക്കിലെ പാന്‍ഗോങ് തടാകത്തിനടുത്താണ് ഇരുരാജ്യത്തെ സൈനികരും തമ്മില്‍ കല്ലേറ് നടത്തിയത്.
സിക്കിം അതിര്‍ത്തിയില്‍ ദോക്‌ലാം മേഖലയില്‍ ഇന്ത്യ-ചൈന സൈനികര്‍ മുഖാമുഖം നിലയുറപ്പിച്ചതിനെ തുടര്‍ന്ന് സംഘര്‍ഷ സാഹചര്യത്തിന് ഇതുവരെ അയവുവന്നിട്ടില്ല. അതിനിടയിലാണ് ഇരു സൈനികരും ആയുധങ്ങളൊന്നും ഉപയോഗിക്കാതെ പരസ്പരം കല്ലേറും കൈയാങ്കളിയും നടത്തിയതായി വിഡിയെ പുറത്തുവന്നത്.
72 സെക്കന്റ് നീണ്ടു നിണ്ടുനില്‍ക്കുന്ന വിഡിയോയെക്കുറിച്ച് പ്രതികരിക്കാന്‍ പ്രതിരോധ മന്ത്രാലയമോ, സൈനിക വക്താവോ തയാറായിട്ടില്ല. അതേസമയം ഈ വിഡിയോയെക്കുറിച്ചുള്ള ആധികാരികതയെക്കുറിച്ച് വ്യക്തമായ വിവരം ലഭിച്ചിട്ടില്ലെന്നാണ് ഉന്നത സൈനിക ഉദ്യോഗസ്ഥന്‍ അറിയിച്ചത്.
എന്നാല്‍ ഏറ്റുമുട്ടലുണ്ടായത് പാന്‍ഗോങ് മേഖലയിലാണെന്ന് നേരത്തെ ഈ മേഖലയില്‍ സേവനം ചെയ്ത സൈനിക ഉദ്യോഗസ്ഥര്‍ സ്ഥിരീകരിച്ചിട്ടുണ്ട്. എന്നാല്‍ ഏറ്റുമുട്ടല്‍ നടത്തിയത് സൈനികരാണോയെന്ന കാര്യത്തെക്കുറിച്ച് വ്യക്തമായ ധാരണയുണ്ടായിട്ടില്ല. വിഡിയോയില്‍ ഏതാണ്ട് 50ഓളം വരുന്ന സൈനികരാണ് ഏറ്റുമുട്ടിയത്.
ലഡാക്കിലെ പാന്‍ഗോങ് തടാകത്തിന്റെ മൂന്നില്‍ രണ്ടുഭാഗവും ചൈനയുടെ അധീനതയിലാണ്.