പൂക്കോട്ടുംപാടം: അനധികൃത മയക്കുമരുന്ന് കൈവശംവച്ചതിനും ഉപയോഗിച്ചതിനും രണ്ടുപേരെ പൂക്കോട്ടുംപാടം പൊലിസ് പിടികൂടി. മഞ്ചേരി മുട്ടിപ്പാലം മങ്കരത്തൊടി മന്‍സൂര്‍ അലി (32), ചോക്കാട് നീലാമ്പ്ര നൗഫല്‍ ബാബു (36) എന്നിവരാണ് പിടിയിലായത്.
ഇന്ത്യയില്‍തന്നെ അപൂര്‍വമായ ആംഫിറ്റാമിന്‍ എന്ന ലഹരിപദാര്‍ഥമാണ് ഇവരില്‍നിന്നു പിടികൂടിയത്. ലഹരി ഉപയോഗിക്കുന്നവരുടെ ഇടയില്‍ ഐസ് ഡ്രഗ് എന്നറിയപ്പെടുന്ന ഇതു ഡി.ജെ പാര്‍ട്ടികളിലും മറ്റും ഉപയോഗിക്കുന്ന വിലകൂടിയ ലഹരിയാണ്. മാരകമായ വിഷമുള്ള ഇവ സുഷുമ്‌നാ നാഡിയെയാണ് കാര്യമായി ബാധിക്കുക. ആംഫിറ്റാമിന് ഒരു ഗ്രാമിന് ഏകദേശം അയ്യായിരം രൂപയ്ക്കു മുകളിലാണ് വില. ലൈംഗിക ഉത്തേജകത്തിനു വിദേശരാജ്യങ്ങളില്‍ ഉള്‍പ്പെടെ കുപ്രസിദ്ധിയാര്‍ജിച്ച ലഹരി വസ്തുവാണിത്. വാഹന പരിശോധനയ്ക്കിടെയാണ് ശനിയാഴ്ച വൈകിട്ട് ആറരയോടെ അമരമ്പലം സൗത്ത് പാലത്തിനു സമീപം ലഹരി ഉപയോഗിക്കുകയായിരുന്ന പ്രതികളെ പൊലിസ് പിടികൂടിയത്.
ഒരു ഗ്രാം മയക്കുമരുന്നും പിടിച്ചെടുത്തു. മന്‍സൂര്‍ എട്ടു വര്‍ഷവും നൗഫല്‍ ഒന്നര വര്‍ഷവും വിദേശത്തു ജയില്‍ശിക്ഷ അനുഭവിച്ചവരാണ്.
പൂക്കോട്ടുംപാടം എസ്.ഐ അമൃത്‌രംഗന്‍, പൊലിസുകാരായ പി. നിബിന്‍ ദാസ്, എസ്. അഭിലാഷ്, ജാഫര്‍, വിനീഷ് തുടങ്ങിയവരാണ് പ്രതികളെ പിടികൂടിയത്.