കോഴിക്കോട്: മത പ്രബോധനത്തിന്റേയും മതപരിവര്‍ത്തനത്തിന്റേയും പേരില്‍ ആള്‍കൂട്ട ആക്രമണങ്ങള്‍ മുതല്‍ വിദ്വേഷ രാഷ്ട്രീയം വരെ പരീക്ഷിച്ച് അരാജകത്വം സൃഷ്ടിക്കുന്ന ഫാസിസ്റ്റ് ഭരണകൂട ഭീകരതയ്‌ക്കെതിരേ എസ്.കെ.എസ്.എസ്.എഫിന്റെ ആഭിമുഖ്യത്തില്‍ നാളെ സംസ്ഥാനത്തെ ജില്ലാ കേന്ദ്രങ്ങളില്‍ മത സ്വാതന്ത്ര്യ സംരക്ഷണ റാലി നടക്കും. റാലി വിജയിപ്പിക്കുന്നതിനായി ജില്ലാ തലങ്ങളില്‍ പ്രചാരണ കണ്‍വന്‍ഷനുകളും നവ മാധ്യമ പ്രചാരണങ്ങളും നടക്കുന്നുണ്ട്.
വൈകിട്ട് നാലിന് ആരംഭിക്കുന്ന റാലിയുടെ സമാപന സമ്മേളനത്തില്‍ ആനുകാലിക വിഷയങ്ങളില്‍ സംഘടന സ്വീകരിക്കുന്ന നിലപാടുകള്‍ വിശദീകരിക്കും.
സംഘടനാ നേതാക്കള്‍ക്ക് പുറമേ രാഷ്ട്രീയ സാംസ്‌കാരിക മേഖലയിലെ പ്രമുഖര്‍ പങ്കെടുക്കും. മത സ്വാതന്ത്ര്യ സംരക്ഷണ റാലി വിജയിപ്പിക്കുന്നതിന് നാളെ പള്ളികളില്‍ ഉദ്‌ബോധന പ്രഭാഷണം നടത്തും.