വാടാനപ്പള്ളി : ഏങ്ങണ്ടിയൂര്‍ സെന്റ് തോമസ് പള്ളിയുടെ ഓഫീസ് കുത്തിതുറന്ന് കമ്പ്യൂട്ടര്‍ മോണിറ്ററും തൃത്തല്ലൂര്‍ ഗവണ്‍മെന്റ് ആശുപത്രിക്ക് കിഴക്കുഭാഗം ആളില്ലാത്ത വീട്ടില്‍ നിന്നും എല്‍.സി.ഡിയും മോഷ്ടിച്ച കേസിലെ പ്രതി ആലുവ ഈസ്റ്റ് കോരുകുത്തി മലയില്‍ മച്ചിമലക്കരയില്‍ താമാസിക്കുന്ന കാട്ടുങ്ങപറമ്പില്‍ റംഷാദ് (25) പിടിയില്‍. വലപ്പാട് എസ്.ഐ .സി.ആര്‍ സന്തോഷും വാടാനപ്പള്ളി എസ്.ഐ ഡി ശ്രീജിത്തും ചേര്‍ന്ന് ആലുവ പൊലീസിന്റെ സഹായത്തോടെയാണ് പ്രതിയെ അറസ്റ്റു ചെയ്തത്. കേസില്‍ നാല് പ്രതികളാണുള്ളത്. ഒരു പ്രതിയെ കൂടി പിടികൂടാനുണ്ട്. ജൂലൈ 17ന് പുലര്‍ച്ചെയാണ് ഏങ്ങണ്ടിയൂര്‍ സെന്റ് തോമസ് പള്ളിയില്‍ മോഷണം നടത്തിയത്. രാവിലെ അഞ്ചരയോടെ പള്ളിയിലെത്തിയ കപ്യാരാണു വാതില്‍ കുത്തി തുറന്ന് കിടക്കുന്നത് കണ്ടത്. തുടര്‍ന്ന് പള്ളിയിലെ സി.സി.ടി.വി പരിശോധിച്ചെങ്കിലും പുലര്‍ച്ചെ 2.10നും 3.55നും ഇടയില്‍ ദൃശ്യങ്ങള്‍ ഒന്നും പതിഞ്ഞിരുന്നില്ല. ഈ മോഷണം കഴിഞ്ഞ് ദിവസങള്‍ക്ക് ശേഷമാണ് തൃത്തല്ലൂര്‍ ഗവണ്‍മെന്റ് ആശുപത്രി പരിസരത്ത് ആള്‍താമസമില്ലാത്ത വീട്ടിലും സമാനമായ രീതിയില്‍ മോഷണം നടന്നത്. ഇവിടെനിന്നും മോഷ്ടാവിന്റേതെന്നു കരുതുന്ന രക്തം കണ്ടെത്തിയിരുന്നു. പിടിയിലായ ഹര്‍ഷാദിനെ കോടതിയില്‍ ഹാജരാക്കി റിമാന്റ് ചെയ്തു.