ബഗ്ദാദ്: കിഴക്കന്‍ ബഗ്ദാദിലെ തിരക്കേറിയ മാര്‍ക്കറ്റിലുണ്ടായ സ്‌ഫോടനത്തില്‍ 12 പേര്‍ കൊല്ലപ്പെട്ടു. സ്‌ഫോടക വസ്തുനിറച്ച കാര്‍ ശീഈ ഭൂരിപക്ഷ ജില്ലയായ സദര്‍ സിറ്റിയിലെ ജാമില മാര്‍ക്കറ്റില്‍ പൊട്ടിത്തെറിക്കുകയായിരുന്നു. 28 പേര്‍ക്ക് സ്‌ഫോടനത്തില്‍ പരുക്കേറ്റു. മരണസംഖ്യ ഉയരാന്‍ സാധ്യതയുണ്ടെന്ന് പൊലിസ് പറഞ്ഞു. സ്‌ഫോടനത്തിനു പിന്നാലെ പ്രദേശം പൊലിസ് ഒഴിപ്പിച്ചു. ആക്രമണത്തിന്റെ ഉത്തരവാദിത്തം ഐ.എസ് ഏറ്റെടുത്തു. ഐ.എസ് അനുകൂല വാര്‍ത്താ ഏജന്‍സിയായ അമാഖിലൂടയാണ് ഐ.എസ് ആക്രമണം നടത്തിയത് തങ്ങളാണെന്ന് അവകാശപ്പെട്ടത്.
കഴിഞ്ഞ ദിവസം ഇറാഖിലെ ഐ.എസിന്റെ നിയന്ത്രണത്തിലുള്ള നഗരമായ തല്‍ഗഫര്‍ ഐ.എസില്‍ നിന്ന് സൈന്യം തിരിച്ചുപിടിച്ചിരുന്നു. സിറിയന്‍ അതിര്‍ത്തിയില്‍ നിന്ന് 150 കി.മി അകലെയാണ് ഈ പ്രദേശം. ഞായറാഴ്ച തല്‍ഗഫര്‍ പൂര്‍ണമായും തിരിച്ചുപിടിച്ചെന്ന് ഇറാഖി സൈന്യം അറിയിച്ചിരുന്നു.
തല്‍ഗഫറില്‍ നിന്ന് 10 കി.മി അകലെയുള്ള അല്‍ അയാദിയ ജില്ലയുടെ പ്രാന്തപ്രദേശവും സൈന്യം തിരിച്ചുപിടിച്ചു. ഇവിടെ കനത്ത ഏറ്റുമുട്ടലുണ്ടായി.