സ്റ്റുട്ട്ഗര്‍ട്: 2018ല്‍ റഷ്യയില്‍ അരങ്ങേറുന്ന ഫിഫ ലോകകപ്പ് ഫുട്‌ബോള്‍ പോരാട്ടത്തിന് യൂറോപ്യന്‍ മേഖലയില്‍ നിന്ന് ബെല്‍ജിയം യോഗ്യത ഉറപ്പിച്ചു. ഗ്രീസിനെ ഒന്നിനെതിരേ രണ്ട് ഗോളുകള്‍ക്ക് കീഴടക്കിയാണ് ബെല്‍ജിയം സീറ്റുറപ്പിച്ചത്. യൂറോപ്യന്‍ മേഖലയില്‍ നിന്ന് യോഗ്യത ഉറപ്പാക്കിയ ആദ്യ ടീമായും ബെല്‍ജിയം മാറി. മറ്റൊരു പോരാട്ടത്തില്‍ ലോക ചാംപ്യന്‍മാരായ ജര്‍മനിക്ക് ഗംഭീര വിജയം. മറുപടിയില്ലാത്ത ആറ് ഗോളുകള്‍ക്ക് നോര്‍വെയെ തകര്‍ത്ത് ലോകകപ്പ് യോഗ്യതയുടെ തൊട്ടടുത്തെത്താന്‍ അവര്‍ക്ക് സാധിച്ചു. ഇംഗ്ലണ്ട്, പോളണ്ട്, ഹോളണ്ട്, പോര്‍ച്ചുഗല്‍, സ്വീഡന്‍ ടീമുകളും വജയിച്ചു. മുന്‍ ചാംപ്യന്‍മാരായ ഫ്രാന്‍സിനെ ലക്‌സംബര്‍ഗ് ഗോള്‍രഹിത സമനിലയില്‍ തളച്ചു.
യാന്‍ വെര്‍ടോന്‍ഗന്‍, റൊമേലു ലുകാകു എന്നിവരാണ് ബെല്‍ജിയത്തിനായി വല ചലിപ്പിച്ചത്. നോര്‍വെയ്‌ക്കെതിരേ ഇരട്ട ഗോളുകളുമായി ടിമോ വെര്‍ണര്‍ തിളങ്ങിയപ്പോള്‍ ആദ്യ പകുതിയില്‍ തന്നെ ജര്‍മനി നാല് ഗോളുകളാണ് വലയിലാക്കിയത്. പത്താം മിനുട്ടില്‍ മെസുറ്റ് ഓസിലാണ് ഗോളടി തുടങ്ങിയത്. ഡ്രാക്‌സ്‌ലര്‍, ഗൊരെറ്റ്‌സ്‌ക, മരിയോ ഗോമസ് എന്നിവരും ലോക ചാംപ്യന്‍മാര്‍ക്കായി ഗോളുകള്‍ നേടി. ഇംഗ്ലണ്ട് 2-1ന് സ്ലോവാക്യയേയും പോളണ്ട് 3-0ത്തിന് കസാഖിസ്ഥാനേയും പോര്‍ച്ചുഗല്‍ 1-0ത്തിന് ഹംഗറിയേയും ഹോളണ്ട് 3-1ന് ബള്‍ഗേറിയയേയും സ്വീഡന്‍ 4-0ത്തിന് ബെലാറസിനേയും പരാജയപ്പെടുത്തി.