പാവറട്ടി: തെരുവ് നായ്ക്കളുടെ കൂട്ടമായ ആക്രമണത്തില്‍ തമിഴ്‌നാട് സ്വദേശിക്ക് പരുക്കേറ്റു. തിരുനെല്ലൂര്‍ കരയോഗം ഓഫീസിന് മുന്നില്‍ വെച്ച് പുലര്‍ച്ച അഞ്ചോടെയാണ് അഞ്ച് നായ്ക്കള്‍ തമിഴ്‌നാട് വയല്‍പ്പെട്ടി രാജനെ കൂട്ടമായി ആക്രമിച്ച് പരുക്കേല്‍പ്പിച്ചത്.
രണ്ട് കൈകളിലും തുടയിലുമാണ് കടിച്ച് പറിച്ചത്. നിലവിളി കേട്ട് ഓടിക്കൂടിയ നാട്ടുകാര്‍ നായക്കൂട്ടത്തില്‍ നിന്ന് രക്ഷപ്പെടുത്തി തൃശൂര്‍ മെഡിക്കല്‍ ഹോസ്പിറ്റലില്‍ എത്തിച്ച് ചികിത്സ നടത്തി. ഏറെ നാളായി തെരുവ് നായകളുടെ ആക്രമണത്തെ കുറിച്ച് ജനങ്ങള്‍ പരാതിപ്പെടുന്നു. തിരുനെല്ലൂര്‍ മുതല്‍ ചക്കംകണ്ടം വരെയുള്ള തീരദേശ മേഖല തെരുവ് നായകളുടെ വിഹാര കേന്ദ്രമായിരിക്കുകയാണെന്നും പഞ്ചായത്ത് അധികൃതരും ജനങ്ങളും ചേര്‍ന്ന സമിതികളുണ്ടാക്കി തെരുവ് നായകളെ അമര്‍ച്ച ചെയ്യണമെന്നാണ് നാട്ടുകാരുടെ ആവശ്യം.