തൃശൂര്‍: ഒല്ലൂരില്‍ വന്‍ കവര്‍ച്ച. ജ്വല്ലറിയുടെ ചുവര്‍തുരന്ന് ഷട്ടറുകള്‍ അറുത്തുമാറ്റി നാലേമുക്കാല്‍ കിലോ സ്വര്‍ണം കവര്‍ന്നു. ഒല്ലൂര്‍ സെന്ററിലെ ആത്മിക ജ്വല്ലറിയിലാണ് കവര്‍ച്ച. ജ്വല്ലറിയുടെ പിന്നിലെ ചുവരാണ് തുരന്നത്. ഇന്നലെ രാവിലെ ജ്വല്ലറി തുറന്നപ്പോഴാണ് കവര്‍ച്ച നടന്നതറിഞ്ഞത്. ഒല്ലൂര്‍ സി.ഐയുടെ നേതൃത്വത്തില്‍ പൊലിസ് സംഘം സ്ഥലത്തെത്തി പരിശോധനകള്‍ നടത്തുകയാണ്. ഫോറന്‍സിക് വിഭാഗവും ഡോഗ് സ്‌ക്വാഡും സ്ഥലത്തെത്തി. സി.സി.ടി.വി ദൃശ്യങ്ങള്‍ അടക്കമുള്ളവ പരിശോധിക്കും.
ജ്വല്ലറി നില്‍ക്കുന്ന ഓട്ടുകമ്പനിയുടെ കോമ്പൗണ്ടിലെ ഓടുമതിലുകള്‍ പൊളിച്ച് ജ്വല്ലറിക്ക് പിന്നിലെത്തിയ മോഷ്ടാക്കള്‍ ജ്വല്ലറിയുടെ ചുവര്‍ തുരന്ന് അകത്തെ ഗ്രില്ലടക്കമുള്ള മൂന്ന് ഷട്ടറുകള്‍ ഗ്യാസ് കട്ടറുകള്‍ ഉപയോഗിച്ച് അറുത്ത് മാറ്റി അകത്തു കടന്ന് ലോക്കറില്‍ സൂക്ഷിച്ചിരുന്ന സ്വര്‍ണാഭരണങ്ങള്‍ കവരുകയായിരുന്നു. വളകള്‍, മാലകള്‍, നെക്‌ലേസുകള്‍ എന്നിവയെല്ലാം നഷ്ടമായതായി ജ്വല്ലറി ഉടമ ചിയ്യാരം സ്വദേശി രഘു പറഞ്ഞു. ജ്വല്ലറിക്കു പിന്നില്‍ നിന്ന് രണ്ട് ഒഴിഞ്ഞ ബാഗുകളും ചെറിയ ഗ്യാസ് സിലിണ്ടറുള്ള ഒരു ബാഗും ലഭിച്ചിട്ടുണ്ട്. ജ്വല്ലറിക്ക് കാവല്‍ക്കാരനില്ല. 2005ലും ഈ സ്ഥാപനത്തില്‍ കവര്‍ച്ച നടന്നിരുന്നു. അന്ന് ഒന്നരകിലോ സ്വര്‍ണമാണ് നഷ്ടമായത്.