വടകര: കോഴിക്കോട് ആകാശവാണിയുടെ വാര്‍ത്താവിഭാഗം നിര്‍ത്തലാക്കാനുള്ള നീക്കത്തില്‍നിന്നു പിന്‍വലിയണമെന്ന് മുല്ലപ്പള്ളി രാമചന്ദ്രന്‍ എം.പി കേന്ദ്ര വാര്‍ത്താവിതരണ പ്രക്ഷേപണ വകുപ്പുമന്ത്രി വെങ്കയ്യ നായിഡുവിനയച്ച കത്തില്‍ ആവശ്യപ്പെട്ടു. 50 വര്‍ഷം പിന്നിടുന്ന കോഴിക്കോട് ആകാശവാണി നിലയത്തിലെ പ്രാദേശിക വാര്‍ത്തകള്‍ മലബാറിലെ ആറു ജില്ലകളിലെയും ലക്ഷദ്വീപിലെയും ജനങ്ങള്‍ക്കു പ്രയോജനപ്രദമാണ്. കോഴിക്കോട്ടു നിന്ന് 6.45നു പ്രക്ഷേപണം ചെയ്യുന്ന പ്രാദേശിക വാര്‍ത്തക്കാണു സംസ്ഥാനത്ത് ഏറ്റവുമധികം ശ്രോതാക്കളുള്ളത്. ന്യൂഡല്‍ഹി ആകാശവാണിയില്‍ നിന്നുള്ള മലയാളം വാര്‍ത്താപ്രക്ഷേപണം നിര്‍ത്താനുള്ള നീക്കവും ഉപേക്ഷിക്കണമെന്ന് മുല്ലപ്പള്ളി ആവശ്യപ്പെട്ടു.