ന്യൂഡല്‍ഹി: അസാമാന്യ മികവിനാല്‍ ശ്രദ്ധേയനായ ബ്രസീല്‍ കൗമാര താരം വിനിഷ്യസ് ജൂനിയര്‍ ഇന്ത്യയിലേക്ക്. അടുത്ത മാസം ഇന്ത്യ ആതിഥേയത്വം വഹിക്കാനൊരുങ്ങുന്ന ഫിഫ അണ്ടര്‍ 17 ലോകകപ്പിനുള്ള ബ്രസീല്‍ ടീമില്‍ ഫഌമംഗോയുടെ ഈ മുന്നേറ്റ താരവും ഇടംപിടിച്ചു. 16കാരനായ വിനിഷ്യസ് ലോകകപ്പിലെ ഏറ്റവും വിലയേറിയ താരമായി മാറുമെന്നാണ് വിദഗ്ധാഭിപ്രായം.
കക്ഷി ചില്ലക്കാരനല്ല. ഇതിനകം തന്നെ ഫുട്‌ബോള്‍ ലോകത്ത് അത്ഭുത ബാലന്‍ എന്ന പേര് സ്വന്തമാക്കിയിട്ടാണ് ബ്രസീല്‍ താരം ഇന്ത്യയിലേക്കെത്തുന്നത്. തീര്‍ന്നില്ല, 2018 ജൂലൈ മാസത്തില്‍ താരം സ്പാനിഷ് കരുത്തരായ റയല്‍ മാഡ്രിഡിന്റെ തട്ടകത്തിലേക്ക് ചേക്കേറും. വിനിഷ്യസിനെ കൈമാറുന്നത് സംബന്ധിച്ച് റയലും ഫഌമെഗോയും ധാരണയിലെത്തിക്കഴിഞ്ഞു. ഏതാണ്ട് 45 കോടി യൂറോയ്ക്കാണ് വിനിഷ്യസ് സാന്റിയാഗോ ബെര്‍ണാബുവിലെത്തുന്നത്.
ലോകകപ്പില്‍ ഗ്രൂപ്പ് ഡിയിലാണ് ബ്രസീലുള്ളത്. നമ്മുടെ കൊച്ചിയും ലോകകപ്പ് വേദികളിലൊന്നാണ്. ബ്രസീലിന്റെ ഒരു ഗ്രൂപ്പ് മത്സരം കൊച്ചിയില്‍ അരങ്ങേറുന്നതിനാല്‍ വിനിഷ്യസിന്റെ കേളീ മികവ് നേരിട്ട് കാണാന്‍ കേരളത്തിലെ ഫുട്‌ബോള്‍ പ്രേമികള്‍ക്കും അവസരമുണ്ട്.
ഭാവിയിലെ മികച്ച ഒരുപിടി താരങ്ങളുടെ സംഗമമാണ് അണ്ടര്‍ 17 ലോകകപ്പ്.
അതില്‍ ഏറ്റവും ശ്രദ്ധേയനാണ് വിനിഷ്യസ്. ബ്രസീലിയന്‍ അത്ഭുത ബാലനടക്കം മികച്ച യുവ താരങ്ങളുടെ മിന്നും പ്രകടനം കാണാനുള്ള അവസരമാണ് ഇന്ത്യയിലെ ഫുട്‌ബോള്‍ പ്രേമികള്‍ക്ക് കൈവന്നിരിക്കുന്നതെന്ന് ടൂര്‍ണമെന്റ് തലവന്‍ ഹാവിയര്‍ സെപ്പി വ്യക്തമാക്കി.