കോതമംഗലം: അനധികൃത മദ്യവില്‍പനക്കാരനും മദ്യം എത്തിച്ചു നല്‍കുന്നയാളും തമ്മില്‍ നടുറോഡില്‍ സംഘട്ടനം. തലക്കോട് പുത്തന്‍കുരിശ് കവലയില്‍ ഇന്നലെ വൈകിട്ട് 5 മണിയോടെയാണ് സംഘട്ടനം അരങ്ങേറിയത്. സംഘട്ടനത്തില്‍ രണ്ട് പേര്‍ക്കും പരുക്കേറ്റു.
ഇവിടങ്ങളില്‍ രാവിലെ മുതല്‍ അനധികൃത മദ്യവില്‍പനയും കഞ്ചാവ് വില്‍പനയും പതിവാണ്. വിവരം പല തവണ എക്‌സൈസ്, പൊലിസ് അധികൃതരെ അറിയിച്ചിട്ടും നടപടിയുണ്ടാകാറില്ലെന്ന് നാട്ടുകാര്‍ പറയുന്നു.
ഒരിക്കല്‍ ഇവിടെയെത്തിയ എക്‌സൈസ് സംഘം കഞ്ചാവ് വില്പനക്കാരന് തന്നെ ഫോണ്‍ നമ്പര്‍ കൈമാറി പോയതായി നാട്ടുകാര്‍ ആരോപിച്ചു. സ്‌കൂള്‍, കോളജ് വിദ്യാര്‍ഥികള്‍ സ്ഥിരമായി തലക്കോട്, പുത്തന്‍കുരിശ് പ്രദേശങ്ങളില്‍ എത്തി കഞ്ചാവ് വാങ്ങിപ്പോകുന്നുണ്ട്. പുത്തന്‍കുരിശ്, തലക്കോട് കവലകളില്‍ ബസ്സിറങ്ങി പോകുന്ന സ്ത്രീകള്‍ക്കും കുട്ടികള്‍ക്കും നേരെ മദ്യപന്മാരുടെ തെറിയഭിഷേകവും പതിവാണ്.
മദ്യവില്പന വില്‍പനക്കാര്‍ക്കും കഞ്ചാവ് വില്പനക്കാര്‍ക്കും എതിരെ നടപടിയെടുക്കാതെ ഒത്തുകളിക്കുന്ന പൊലിസ്, എക്‌സൈസ് അധികൃതരുടെ നിലപാടുകള്‍ക്കെതിരെ നാട്ടുകാര്‍ പ്രതിഷേധത്തിലാണ്.
പ്രദേശത്ത് പൊലിസ് പട്രോളിംഗ് ശക്തമാക്കണമെന്ന ആവശ്യവും ശക്തമാണ്.