പൊന്നാനി: മുന്‍ എം.പി സി. ഹരിദാസിനു തെരുവുനായയുടെ ആക്രമണത്തില്‍ പരുക്കേറ്റു. സംഭവത്തെ തുടര്‍ന്ന് ഇദ്ദേഹത്തെ എറണാകുളത്തെ സ്വകാര്യ ആശുപത്രിയില്‍ പ്രവേശിപ്പിച്ചു. തെരുവുനായ കടിക്കാന്‍ എത്തിയതിനെ തുടര്‍ന്നു വീണ് പരുക്കേറ്റാണ് മുന്‍ എം.പിയും കോണ്‍ഗ്രസ് നേതാവുമായ സി. ഹരിദാസിനെ എറണാകുളത്തെ സ്വകാര്യ ആശുപത്രിയില്‍ പ്രവേശിപ്പിച്ചത്.
ഇന്നലെ രാവിലെയായിരുന്നു സംഭവം. തവനൂര്‍ വില്വമംഗലത്തു നടന്ന പരിപാടിയില്‍ പങ്കെടുക്കുന്നതിനായി വീട്ടില്‍നിന്നു രാവിലെ ഏഴരയോടെ ഇറങ്ങുന്നതിനിടയിലാണ് തെരുവുനായ ആക്രമിച്ചത്. വീട്ടുമുറ്റത്തു നില്‍ക്കുകയായിരുന്ന ഇദ്ദേഹത്തിനു നേരെ നായ പാഞ്ഞടുത്തതോടെ തിരിഞ്ഞോടുന്നതിനിടെ വീണ് ഇടുപ്പെല്ലിനു പരുക്കേല്‍ക്കുകയായിരുന്നു. തുടര്‍ന്ന് എടപ്പാളിലെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും പരുക്ക് ഗുരുതരമായതിനാല്‍ എറണാകുളത്തെ ആശുപത്രിയിലേക്കു മാറ്റി.