മാനന്തവാടി: അസൗകര്യങ്ങളില്‍ വീര്‍പ്പുമുട്ടുന്ന മാനന്തവാടി എക്‌സൈസ് റെയ്ഞ്ച് ഓഫിസിന്റെ പ്രവര്‍ത്തനം നാള്‍ക്കുനാള്‍ ദുരിതപൂര്‍ണമാകുന്നു. പീച്ചാങ്കോട്ടുള്ള വാടകക്കെട്ടിടത്തിലാണ് കഴിഞ്ഞ 16 വര്‍ഷമായി ഓഫിസ് പ്രവര്‍ത്തിക്കുന്നത്. എക്‌സൈസ് കേസുകളില്‍ പിടിച്ചെടുത്ത വാഹനങ്ങള്‍ നിര്‍ത്തിയിടാനും ജീവനക്കാര്‍ക്ക് വിശ്രമിക്കാനും സൗകര്യങ്ങളില്ലാത്ത അവസ്ഥയാണുള്ളത്. ജില്ലയില്‍ മൂന്ന് എക്‌സൈസ് സര്‍ക്കിളുകള്‍ക്ക് കീഴിലായി മൂന്ന് റെയ്ഞ്ച് ഓഫിസുകളാണ് നിലവിലുള്ളത്. ഇവയെല്ലാം തന്നെ വാടക കെട്ടിടങ്ങളിലാണ് പ്രവര്‍ത്തിക്കുന്നത്. എന്നാല്‍ മാനന്തവാടി റെയ്ഞ്ച് എക്‌സൈസ് ഓഫിസാണ് അസൗകര്യങ്ങളില്‍ ഏറെ വീര്‍പ്പുമുട്ടുന്നത്. 2011 നവംബര്‍ മുതലാണ് പൊരുന്നന്നൂര്‍ പ്രാഥമികാരോഗ്യ കേന്ദ്രത്തോട് തൊട്ടുള്ള രണ്ട് സ്വകാര്യ ക്വാര്‍ട്ടേഴ്‌സ് മുറികളിലായി ഓഫിസ് പ്രവര്‍ത്തനം തുടങ്ങിയത്. നിലവില്‍ ഓഫിസിന് ചുറ്റുമായി ചെറുതും വലുതുമായ പല കേസുകളില്‍ പിടിച്ചെടുത്ത 38 വാഹനങ്ങള്‍ പാര്‍ക്ക് ചെയ്തിട്ടുണ്ട്. സ്വകാര്യ വ്യക്തികളുടെ വീടുകളിലേക്കുള്ള വഴികളില്‍ പോലും വാഹനങ്ങള്‍ പാര്‍ക്ക് ചെയ്തിരിക്കുകയാണ്. പിടിച്ചെടുത്ത വാഹനങ്ങള്‍ ലേല നടപടികളിലൂടെ കൈമാറാത്തതിനാലാണ് വാഹനങ്ങള്‍ നിര്‍ത്തിയിടാനിടമില്ലാതായത്. വെള്ളമുണ്ട, മാനന്തവാടി, തലപ്പുഴ, തിരുനെല്ലി, പനമരം പൊലിസ് സ്‌റ്റേഷന്‍ പരിധികളുള്ള എക്‌സൈസ് റെയ്ഞ്ച് ഓഫിസില്‍ മൂന്ന് വനിതാ ജീവനക്കരുള്‍പ്പെടെ 20 ജീവനക്കാരാണ് നിലവിലുള്ളത്.
ഫയലുകള്‍ സൂക്ഷിക്കാനും വിശ്രമിക്കാനുമായി ഇടുങ്ങിയ മുറികളും. നാല് വര്‍ഷം മുന്‍പ് വനിതാ ഗാര്‍ഡുമാരെ സര്‍വിസിലെടുത്തെങ്കിലും ഓഫിസുകളില്‍ ഇവര്‍ക്കായി പ്രത്യേക സൗകര്യങ്ങളൊന്നും ഒരുക്കിയിട്ടില്ല.
എന്നാല്‍ ഇത്തരം പരാധീനതകള്‍ക്കിടയില്‍ വീര്‍പ്പു മുട്ടുമ്പോഴും ഓണത്തോടനുബന്ധിച്ച് കഴിഞ്ഞ ഒരു മാസം നടത്തിയ സ്പഷല്‍ റൈഡില്‍ 35 കേസുകളാണ് രജിസ്റ്റര്‍ ചെയ്തത്. 23 അബ്കാരി കേസുകളിലായി 420 ലിറ്റര്‍ വാഷും 21 ലിറ്റര്‍ നാടന്‍ ചാരായവും 32.5 ലിറ്റര്‍ ഇന്ത്യന്‍ നിര്‍മിത വിദേശ മദ്യവും പിടികൂടിയിരുന്നു.
12 നാര്‍ക്കോട്ടിക് കേസുകളിലായി കഞ്ചാവ് ചെടികളും 805 ഗ്രാം കഞ്ചാവും റെയ്ഞ്ച് ഓഫിസറുടെ നേതൃത്വത്തിലുള്ള സംഘം പിടികൂടിയിരുന്നു. എന്നാല്‍ പിടികൂടുന്ന വാഹനങ്ങള്‍ നിര്‍ത്തിയിടാന്‍ ഇടമില്ലാത്തതും ജീവനക്കാര്‍ക്ക് മതിയായ സൗകര്യങ്ങളില്ലാത്തതും ജീവനക്കാര്‍ക്ക് വെല്ലുവിളിയാവുകയാണ്. കാര്യക്ഷമമായി പ്രവര്‍ത്തിക്കാന്‍ കൂടുതല്‍ സൗകര്യങ്ങളുള്ള കെട്ടിടത്തിലേക്ക് ഓഫിസ് മാറ്റണമെന്ന ആവശ്യം ശക്തമാകുകയാണ്.