പന്തല്ലൂര്‍: വേതനവര്‍ധനവും ആനുകൂല്യങ്ങളും നല്‍കണമെന്ന് ആവശ്യപ്പെട്ട് തമിഴ്‌നാട് സര്‍ക്കാരിന്റെ അധീനതയിലുള്ള ടാന്‍ടീ കോര്‍പറേഷന്‍ തേയിലതോട്ടം തൊഴിലാളികളുടെ സമരം നാലാം ദിവസത്തിലേക്ക് കടന്നു. ദിവസക്കൂലി 300 രൂപയായി ഉയര്‍ത്തുക, കൂലിയോടെ വര്‍ഷാന്ത ഒഴിവുദിനങ്ങള്‍ അനുവദിക്കുക, മെഡിക്കല്‍ ലീവ് ആനുകൂല്യം അനുവദിക്കുക, പാര്‍പ്പിടങ്ങളുടെ അറ്റകുറ്റപ്പണികള്‍ നടത്തുക, 10 വര്‍ഷമായി തൊഴിലെടുക്കുന്ന താല്‍കാലിക തൊഴിലാളികളെ സ്ഥിരപ്പെടുത്തുക തുടങ്ങിയ ആവശ്യങ്ങള്‍ ഉന്നയിച്ചാണ് ഇവര്‍ സമരം നടത്തുന്നത്.
രാവിലെ എട്ടോടെ എസ്‌റ്റേറ്റ് മസ്റ്റര്‍ ഓഫിസിനുമുന്നില്‍ മുദ്രാവാക്യം വിളിച്ചെത്തുന്ന തൊഴിലാളികള്‍ പിന്നീട് ജോലിയില്‍ പ്രവേശിക്കുന്നുണ്ട്. ജോലി കഴിഞ്ഞ് വൈകിട്ട് അഞ്ചോടെ മുദ്രാവാക്യം വിളികളോടെ വീണ്ടും മസ്റ്ററിലെത്തി പിരിഞ്ഞുപോകുന്ന രീതിയിലാണ് സമരം.
കഴിഞ്ഞ ഞായറാഴ്ച പന്തല്ലൂര്‍ ടൗണില്‍ നാല് ഡിവിഷനിലെയും തൊഴിലാളികള്‍ എട്ടു മണിക്കൂര്‍ നിരാഹാരത്തോടെ പ്രഖ്യാപിച്ച വിജയംവരെയുള്ള സമരം ബന്ധപ്പെട്ട ഡിവിഷനുകളിലെ പ്രാദേശിക നേതൃത്വത്തിന്‍ കീഴിലാണ് തുടരുന്നത്.
ബുധനാഴ്ച കൊളപ്പള്ളി രണ്ടാം റേഞ്ച് ഓഫീസിന് മുമ്പില്‍ നടന്ന പ്രതിഷേധ പ്രകടനത്തില്‍ സ്ത്രീ തൊഴിലാളികളടക്കം 120പേര്‍ പങ്കെടുത്തു. പി.ഡബ്ല്യു.ഇ.സി തൊഴില്‍ സംഘം പ്രാദേശിക കമ്മിറ്റി പ്രസിഡന്റ് എസ് രാജേന്ദ്രന്‍ സമരത്തിന് നേതൃത്വം നല്‍കി.