നെടുമങ്ങാട്: സ്‌കൂള്‍ പാര്‍ലമെന്റ് തെരഞ്ഞെടുപ്പ് അരുവിക്കര ഗവ. ഹയര്‍സെക്കന്‍ഡറി സ്‌കൂളില്‍ വേറിട്ട അനുഭവമായി.
ഒരു പൊതുതെരഞ്ഞെടുപ്പിന്‍െ ്രസജ്ജീകരണങ്ങളോടെയാണ് വിദ്യാര്‍ഥികള്‍ തെരഞ്ഞെടുപ്പ് പ്രക്രിയയില്‍ പങ്കെടുത്തത്.  28 ബൂത്തുകള്‍  ഇതിനായി സജ്ജമാക്കി . ക്ലാസ് ടീച്ചര്‍ പ്രിസൈഡിങ് ഓഫീസറായപ്പോള്‍ വിദ്യാര്‍ഥികളാണ് പോളിങ് ഉദ്യോഗസ്ഥരുടെ ചുമതല ഏറ്റെടുത്തത്. വോട്ടര്‍പ്പട്ടിക, വോട്ടേഴ്‌സ് രജിസ്റ്റര്‍, മഷി പുരട്ടല്‍, പ്രിന്റ് ചെയ്ത ബാലറ്റ് എന്നിവയും ഉപയോഗിച്ചു.
രാവിലെതന്നെ ബൂത്തുകളുടെ മുന്നില്‍ വിദ്യാര്‍ഥികളുടെ നീണ്ട നിര പ്രത്യക്ഷപ്പെട്ടു. പോളിങ് ഉദ്യോഗസ്ഥരുടെ ചുമതല നല്‍കിയ വിദ്യാര്‍ഥികള്‍ക്കു തലേദിവസംതന്നെ പരിശീലനം നല്‍കിയിരുന്നു. സ്‌കൂള്‍ ചെയര്‍മാനായി പ്രിന്‍സിനെയും വൈസ്‌ചെയര്‍മാനായി ചന്ദനയെയും തെരഞ്ഞെടുത്തതായി വരണാധികാരി അറിയിച്ചു.
പ്രിന്‍സിപാള്‍  ഗണപതി, ഹെഡ്മിസ്ട്രസ് പുഷ്പവല്ലി, പി.ടി.എ പ്രസിഡന്റ് മണികണ്ഠന്‍, ഷജീര്‍ എന്നിവര്‍ തെരഞ്ഞെടുപ്പ് നിരീക്ഷകരായി. സ്‌കൂള്‍  അധ്യാപകന്‍ സതീഷാണ് തെരഞ്ഞെടുപ്പ് പ്രവര്‍ത്തനങ്ങള്‍ക്കു നേതൃത്വം നല്‍കിയത്.