ബോവിക്കാനം: സി.പി.എം കാറഡുക്ക ഏരിയാ കമ്മിറ്റി അംഗവും മുളിയാര്‍ പഞ്ചായത്ത് അംഗവുമായ എം. മാധവന്റെ വീടിനു നേരെ അക്രമണം. കഴിഞ്ഞ ദിവസം രാത്രി പന്ത്രണ്ടോടെയാണു സംഭവം. കല്ലേറില്‍ വീടിന്റെ ജനല്‍ച്ചില്ലുകള്‍ തകര്‍ന്നു. ബി.ജെ.പി പ്രവര്‍ത്തകരായ നാലംഗ സംഘമാണ് അക്രമണം നടത്തിയതെന്നു സി.പി.എം നേതൃത്വം ആരോപിച്ചു.
രണ്ടു ദിവസം മുമ്പു നെക്രംപാറയില്‍ ബാലസംഘം മുളിയാര്‍ വില്ലേജ് സെക്രട്ടറി ബിജേഷിനും മുള്ളേരിയയില്‍ എസ്.എഫ്.ഐ നേതാവ് ടി. മനോജിനും മര്‍ദനമേറ്റിരുന്നു. ഇതിനു പിന്നില്‍ ആര്‍.എസ്.എസ് പ്രവര്‍ത്തകരാണെന്നാണ് ആരോപണം. ഇതിന്റെ തുടര്‍ച്ചയെന്നൊണം കഴിഞ്ഞ ദിവസം ഇരിയണ്ണിയില്‍ എ.ബി.വി.പി പ്രവര്‍ത്തകന്‍ എ.പി ജിഷ്ണു പ്രസാദിനും മര്‍ദനമേറ്റിരുന്നു. ഇതേ തുടര്‍ന്ന് ആദൂര്‍ സ്റ്റേഷനില്‍ നടന്ന ഉഭയകക്ഷി ചര്‍ച്ചയില്‍ ഇരുപാര്‍ട്ടികളും അക്രമം അവസാനിപ്പിക്കാന്‍ തീരുമാനിച്ചിരുന്നു.
ഇതിനു തൊട്ടുപിന്നാലെയാണു മാധവന്റെ വീടിനു നേരെ അക്രമം നടന്നത്. അക്രമത്തില്‍ പ്രതിഷേധിച്ചു സി.പി.എം പ്രവര്‍ത്തകര്‍ ബോവിക്കാനത്തു പ്രതിഷേധ പ്രകടനം നടത്തി.
അതേസമയം, അക്രമ സംഭവവുമായി ബന്ധപ്പെട്ട് 21 പേര്‍ക്കെതിരേ ആദൂര്‍ പൊലിസ് കേസെടുത്തു. സി.പി.എം നേതാവും പഞ്ചായത്ത് അംഗവുമായ മാധവന്റെ വീടിനു നേരെ ഉണ്ടായ അക്രമത്തില്‍ എട്ട് ബി.ജെ.പി പ്രവര്‍ത്തകര്‍ക്കെതിരേ കേസെടുത്തു.
മുള്ളേരിയയില്‍ എസ്.എഫ്.ഐ നേതാവ് മനോജിനെ അക്രമിച്ചതിനു ബി.ജെ.പി.പ്രവര്‍ത്തകരായ സുരേഷ്, ഭരതന്‍ തുടങ്ങിയ അഞ്ചു പേര്‍ക്കെതിരേയും ഇരിയണ്ണിയില്‍ എ.ബി.വി.പി പ്രവര്‍ത്തകന്‍ ജിഷ്ണു പ്രസാദിനെ അക്രമിച്ച സംഭവത്തില്‍ ദിനേഷ്, മിഥുന്‍, ഹരി തുടങ്ങിയ എട്ടു സി.പി.എം പ്രവര്‍ത്തകര്‍ക്കെതിരേയുമാണു കേസെടുത്തത്.