കോട്ടയം: റീസര്‍വേ നടത്തി ലഭിക്കുന്ന മിച്ചഭൂമി ഭൂരഹിതര്‍ക്ക് വിതരണം ചെയ്യാന്‍ നടപടി സ്വീകരിക്കുമെന്നു റവന്യൂമന്ത്രി ഇ. ചന്ദ്രശേഖരന്‍. ഇതിനായി റീസര്‍വേ പുനരാരംഭിച്ച് വേഗത്തില്‍ പൂര്‍ത്തിയാക്കുമെന്നും അദ്ദേഹം അറിയിച്ചു. ജില്ലയിലെ പ്രധാന പ്രശ്‌നങ്ങളും അടിയന്തര പ്രാധാന്യത്തോടെ പരിഹാരം കാണേണ്ട  വിഷയങ്ങളും ചര്‍ച്ച ചെയ്യുന്നതിനു കലക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന യോഗത്തില്‍ സംസാരിക്കുകയായിരുന്നു അദ്ദേഹം.
സര്‍ക്കാര്‍ ഭൂമി കൈയേറുന്നവര്‍ക്കെതിരേ കര്‍ശന നടപടി സ്വീകരിക്കണമെന്ന് മന്ത്രി  ഉദ്യോഗസ്ഥര്‍ക്ക് നിര്‍ദേശം നല്‍കി. ഭൂരഹിതര്‍ക്ക് ഭൂമി ലഭിക്കാതിരിക്കുമ്പോള്‍ ഭൂമിയുള്ളവര്‍ നിയമങ്ങളെ കാറ്റില്‍ പറത്തി സര്‍ക്കാര്‍ ഭൂമി കൈയേറുകയാണ്. പട്ടയം ലഭിച്ചിട്ടും ഭൂമി ലഭിച്ചിട്ടില്ലാത്തവര്‍ക്ക് ഭൂമി കണ്ടെത്തി വിതരണം ചെയ്യാന്‍ നടപടി സ്വീകരിക്കണം.
ഉദ്യോഗസ്ഥരില്‍ നിന്ന് ജനങ്ങള്‍ പ്രതീക്ഷിക്കുന്നത് നിയമാനുസൃതനീതി മാത്രമാണ്. അത് ഉറപ്പുവരുത്തേണ്ട ഉത്തരവാദിത്തം ഉദ്യോഗസ്ഥര്‍ക്കുണ്ട്. ഉദ്യോഗസ്ഥര്‍ സംഘടിതരാണെന്നും സേവനങ്ങള്‍ക്ക് സമീപിക്കുന്ന ജനങ്ങള്‍ അസംഘടിതരുമാണെന്ന ബോധം ഉണ്ടാകണം. ചട്ടങ്ങള്‍ക്ക് വിധേയമായി ജനങ്ങള്‍ക്ക് പരമാവധി സേവനം ചെയ്യാന്‍ ഉദ്യോഗസ്ഥര്‍ ശ്രദ്ധിക്കണമെന്നും മന്ത്രി പറഞ്ഞു.