കോഴിക്കോട്: ബി.ജെ.പിയെ പ്രതിരോധിക്കാന്‍ സി.പി.എമ്മിനു മാത്രമേ സാധിക്കൂവെന്ന മുഖ്യമന്ത്രി പിണറായി വിജയന്റെ കോഴിക്കോട്ടെ പ്രസംഗം ബി.ജെ.പിക്കുള്ള തലോടലാണെന്ന് ഡി.സി.സി പ്രസിഡന്റ് ടി. സിദ്ദീഖ് വാര്‍ത്താ സമ്മേളനത്തില്‍ പറഞ്ഞു.
ഇന്ദിരാ ഗാന്ധി മെമ്മോറിയല്‍ അക്കാദമി ഫോര്‍ റിസര്‍ച്ച് ആന്‍ഡ് സ്റ്റഡീസിന്റെ  (ഇഗ്മ) ആഭിമുഖ്യത്തില്‍ നടത്തുന്ന ദേശീയ സാംസ്‌കാരിക പ്രതിരോധം  നാളെ മലബാര്‍ പാലസ് കുഞ്ഞാലിമരയ്ക്കാര്‍ ഹാളില്‍ നടക്കുമെന്നും സിദ്ദീഖ് കുട്ടിച്ചേര്‍ത്തു. 'ഇന്ത്യയെ കൊല്ലുന്ന ഫാസിസത്തിനെതിരേ' പ്രമേയവുമായി വൈകിട്ട് മൂന്നിനു നടക്കുന്ന പരിപാടി എം.ടി വാസുദേവന്‍ നായര്‍ ഉദ്ഘാടനം ചെയ്യും. മണിശങ്കര്‍ അയ്യര്‍, എം. മുകുന്ദന്‍, യു.കെ കുമാരന്‍, എം.എന്‍ കാരശ്ശേരി, സാറാ ജോസഫ്, വയലാര്‍ ശരത്ചന്ദ്രവര്‍മ്മ സംസാരിക്കും. പരിപാടിയോടനുബന്ധിച്ച് ഗാന്ധി മുതല്‍ ഗൗരി വരെ ചിത്ര പ്രദര്‍ശനവും നടക്കും.
ഡി.സി.സി ഭാരവാഹികളായ ചോലയ്ക്കല്‍ രാജേന്ദ്രന്‍, പി.എം അബ്ദുറഹ്മാന്‍, ഹബീബ് തമ്പി, ഇടക്കുനി അബ്ദുറഹ്മാന്‍ വാര്‍ത്താസമ്മേളനത്തില്‍ സംബന്ധിച്ചു.