മട്ടാഞ്ചേരി: കേരള തീരത്ത് മത്സ്യബന്ധന ബോട്ടുകള്‍ പതിവായി അപകടത്തില്‍പ്പെടുന്നത് വേണ്ടത്ര സുരക്ഷാ പരിശോധനയില്ലാത്തത് മൂലമെന്ന് ആക്ഷേപം.
അടുത്ത ദിവസങ്ങളിലായി മൂന്ന് യാനങ്ങളാണ് അപകടത്തില്‍പ്പെട്ടത്. കഴിഞ്ഞ ദിവസം പുറംകടലില്‍ ഗോകുല്‍ദായെന്ന ബോട്ട് പലക തകര്‍ന്ന് മുങ്ങിയിരുന്നു. ചാവക്കാട് കടലില്‍ മത്സ്യബന്ധന ബോട്ടും അപകടത്തില്‍പ്പെട്ടു. ഇന്നലെ പുറംകടലില്‍ നീതിമാന്‍ എന്ന ബോട്ടും അപകടത്തില്‍പ്പെടുകയും തുടര്‍ന്നു മുങ്ങുകയും ചെയ്തു.
ഭൂരിഭാഗം ബോട്ടുകള്‍ക്കും രജിസ്‌ട്രേഷനോ ലൈസന്‍സോയില്ലയെന്നതാണ് യാഥാര്‍ഥ്യം. കൊച്ചി അഴിമുഖത്ത് കൂടെ പോകുന്ന യാനങ്ങള്‍ പോര്‍ട്ടിന്റെ അനുമതി വാങ്ങണമെന്നാണ് ചട്ടം.
എന്നാല്‍ ഭൂരിഭാഗം മല്‍സ്യബന്ധന യാനങ്ങളും ഈ അനുമതി വാങ്ങാറില്ല. പലപ്പോഴും യാനങ്ങള്‍ അപകടത്തില്‍പ്പെടുമ്പോഴാണ് ഇത്തരം കാര്യങ്ങള്‍ പരിശോധിക്കാറ്. അധികൃതരുടെ അനാസ്ഥയാണ് ഇത്തരത്തില്‍ അനധികൃതമായി യാനങ്ങള്‍ പ്രവര്‍ത്തിക്കുന്നതിന് കാരണമായത്. ഇതോടെ മത്സ്യബന്ധന യാനങ്ങളുടെ സുരക്ഷാ പരിശോധന ശക്തമാക്കണമെന്ന ആവശ്യം ഉയര്‍ന്നിട്ടുണ്ട്.