അക്രമണത്തിനു നേതൃത്വം നല്‍കിയതായി പറയപ്പെടുന്ന സംഘത്തിലെ ഒരാളെയും വാഹനവും പൊലിസ് കസ്റ്റഡിയില്‍ എടുത്തിട്ടുണ്ട്
പീരുമേട്: ഏലപ്പാറ കോഴിക്കാനത്ത് കോണ്‍ഗ്രസ്-സി.പി.എം. സംഘര്‍ഷം. സംഘര്‍ഷത്തില്‍ നാലുപേര്‍ക്ക് പരുക്ക്.
സി.പി.എം ഏലപ്പാറ ലോക്കല്‍ കമ്മിറ്റിയംഗം ബോസന്‍ (40), കോണ്‍ഗ്രസ് പ്രവര്‍ത്തകരായ വി. തോമസ് (33), സരോജ (54), ദീപക് എന്നിവര്‍ പരുക്കുകളോടെ ആശുപത്രിയില്‍ ചികിത്സ തേടി.
കഴിഞ്ഞ ദിവസം രാത്രി കോഴിക്കാനം കിഴക്കേ പുതുവലില്‍ കുടുംബ പ്രശ്‌നം പറഞ്ഞു തീര്‍ക്കുന്നതിനായാണ് അഞ്ചോളം വരുന്ന സി പി എം പ്രവര്‍ത്തകര്‍ എത്തിയത്.
എന്നാല്‍ യാതൊരു പ്രകോപനവും കൂടാതെ കോണ്‍ഗ്രസ് പ്രവര്‍ത്തകരുടെ നേതൃത്വത്തില്‍ വഴിയില്‍ തടഞ്ഞു നിര്‍ത്തി മാരകായുധങ്ങള്‍ ഉപയോഗിച്ച് അക്രമിച്ചതായാണ് പരാതിയില്‍ പറയുന്നത്.
സംഭവുമായി ബന്ധപ്പെട്ട് പീരുമേട് പൊലിസില്‍ പരാതിയും നല്‍കി. അക്രമണത്തിനു നേതൃത്വം നല്‍കിയതായി പറയപ്പെടുന്ന സംഘത്തിലെ ഒരാളെയും വാഹനവും പൊലിസ് കസ്റ്റഡിയില്‍ എടുത്തിട്ടുണ്ട്.
അക്രമിക്കാന്‍ ശ്രമിച്ചപ്പോള്‍ തടയാന്‍ ശ്രമിക്കുകയും തുടര്‍ന്നു പരിക്കേറ്റതായും കോണ്‍ഗ്രസ് പ്രവര്‍ത്തകരും പറയുന്നു.
എന്നാല്‍ സംഭവത്തിനു പിന്നില്‍ രാഷ്ട്രീയമല്ല വ്യക്തി വൈരാഗ്യമാണെന്നും പൊലിസ് പറയുന്നു. പരിക്കേറ്റ കോണ്‍ഗ്രസ് പ്രവര്‍ത്തകര്‍ കോട്ടയം മെഡിക്കല്‍ കോളജ് ആശുപത്രിയില്‍ ചികിത്സയിലാണ്.