കൊപ്പം: കനത്തമഴയില്‍ പുഴയിലൂടെ ഒഴുകിയെത്തി ജനവാസ കേന്ദ്രങ്ങളിലെത്തുന്ന പാമ്പുകളും ഭീഷണി ഉയര്‍ത്തുന്നു. പുഴയില്‍ നിന്നും തോടുകളിലൂടെ പാടത്തെത്തുന്ന വെള്ളത്തിലൂടെയാണ് ഇഴജന്തുക്കളെത്തുന്നത്. അണലി, ശംഖുവരയന്‍ തുടങ്ങിയ പാമ്പുകള്‍ വെള്ളത്തിലൂടെ എത്തുന്നതായി നാട്ടുകാര്‍ പറയുന്നു. ഇതുകാരണം ജനങ്ങള്‍ പുറത്തിറങ്ങാന്‍ ഭയപ്പെടുന്നു. തിരുവേഗപ്പുറ ചെക്ക് പോസ്റ്റിനു സമീപം നിലമ്പൂര്‍ കോളനിയിലാണ് പാമ്പുകള്‍ വ്യാപകമായി എത്തുന്നത്. കൈപ്പുറം അബ്ബാസ് സ്ഥലത്തെത്തി കഴിഞ്ഞ ദിവസം മൂര്‍ഖനെ പിടികൂടി. ഈ പ്രദേശത്ത് പുഴവെള്ളമെത്തിയതിനാല്‍ പാമ്പ് അതിലൂടെ ഒഴുകിയെത്തിയതാണെന്ന് സംശയിക്കുന്നു. പുഴയോട് ചേര്‍ന്ന പ്രദേശമായതിനാല്‍ ഇവിടെ പലപ്പോഴും പാമ്പുകളുടെ ശല്യമുണ്ടാവാറുണ്ട്. മാസങ്ങള്‍ക്ക് മുമ്പ് പാമ്പ് കടിയേറ്റ് ഇവിടെ ഒരാള്‍ മരണപ്പെട്ടിരുന്നു. അടുത്ത ദിവസം അണലിയുടെ കടിയേറ്റ ഒരാള്‍ ചികിത്സയിലാണ്. ഈ പ്രദേശത്ത് നിന്ന് ഇതിനുമുമ്പും ധാരാളം അണലികളെയും മൂര്‍ഖനുകളെയും കൈപ്പുറം അബ്ബാസ് പിടികൂടിയിട്ടുണ്ട്.