കൊണ്ടോട്ടി: ദുബൈയില്‍ നിന്നെത്തിയ യാത്രക്കാരന്‍ പ്രത്യേക മിശ്രിത്തില്‍ കലര്‍ത്തി ഒളിപ്പിച്ചു കടത്തിയ 961 ഗ്രാം സ്വര്‍ണം കരിപ്പൂര്‍ എയര്‍ കസ്റ്ററംസ് ഇന്റലിജന്‍സ് വിഭാഗം പിടികൂടി. എയര്‍ ഇന്ത്യ എക്‌സ്പ്രസ്് വിമാനത്തില്‍ കരിപ്പൂരിലെത്തിയ നിലമ്പൂര്‍ സ്വദേശി ഷഫീഖി (27)ല്‍ നിന്നാണ് സ്വര്‍ണം കണ്ടെത്തിയത്.
പ്രത്യേക കവറുകളിലാക്കി കാലുകളില്‍ കെട്ടി വച്ച രീതിയില്‍ മഞ്ഞ നിറത്തിലുള്ള മിശ്രിതമാണ് കസ്റ്റംസ് കണ്ടെത്തിയത്.
1.619 കിലോഗ്രാം തൂക്കമുണ്ടായിരുന്ന മിശ്രിതത്തില്‍ നിന്ന് 961 ഗ്രാം സ്വര്‍ണമാണ് വേര്‍തിരിച്ചെടുത്തത്. 4 പാക്കറ്റുകളായാണ് ഇവ ഉണ്ടായിരുന്നത്. പെട്ടെന്ന് കണ്ടെത്താന്‍ കഴിയാത്ത തരത്തിലാണ് ഇവ കാലില്‍ ഒട്ടിച്ചുവച്ചിരുന്നത്. മുന്‍കൂട്ടി വിവരം ലഭിച്ചതനുസരിച്ച് കാത്തിരുന്ന എയര്‍ കസ്റ്റംസ് ഇന്റലിജന്‍സ് വിഭാഗം ഇയാളെ നിര്‍ഗമന ഹാളിന്റെ വാതിലില്‍ തടയുകയും പരിശോധിക്കുകയുമായിരുന്നു. കണ്ടെടുത്ത 961 ഗ്രാം സ്വര്‍ണത്തിന് ഇന്ത്യന്‍ വിപണിയില്‍ 29,40, 000 രൂപ വിലവരും.
കസ്റ്റംസ് അസി.കമ്മിഷണര്‍ രാജേന്ദ്രബാബുവിന്റെ നേതൃത്വത്തില്‍ സൂപ്രണ്ടുമാരായ ദാസ് മാലിക്ക്, പാട്രിസ് ജോസഫ് , ഇന്‍സ്‌പെക്ടര്‍മാരായ സത്യവേന്ദ്ര സിങ്, രാം ലാല്‍,സന്ദീപ് കുമാര്‍ എന്നിവരടങ്ങിയ സംഘമാണ് കള്ളക്കടത്ത് പിടികൂടിയത്.