തലശ്ശേരി: തലശ്ശേരി പുതിയ ബസ്റ്റാന്റില്‍ പൂവാല ശല്യം രൂക്ഷമായതിനെത്തുടര്‍ന്ന് മഫ്ടിയിലെത്തിയ പൊലിസ് രണ്ട് യുവാക്കളെ കസ്റ്റഡിയിലെടുത്തു. നഗരത്തിലെ ഹയര്‍ സെക്കന്‍ഡറി സ്‌കൂളില്‍ പഠിക്കുന്ന പെണ്‍കുട്ടികളെ ശല്യം ചെയ്ത സംഭവത്തില്‍ വര്‍ക്ക്‌ഷോപ്പ് ജീവനക്കാരായ പാനൂര്‍ സ്വദേശി സിദ്ധാര്‍ഥ്(24), കൊളശ്ശേരി സ്വദേശി സാജന്‍(21) എന്നിവരെയാണ് തലശ്ശേരി സി.ഐ പ്രദീപന്‍ കണ്ണിപ്പൊയിലിന്റെ നേതൃത്വത്തിലുള്ള പൊലിസ് സംഘം കസ്റ്റഡിയിലെടുത്തത്. ഇതിനിടെ സംഘത്തിലെ രണ്ട് പേര്‍ ഓടി രക്ഷപ്പെടുകയും ചെയ്തു. പിടിയിലായവരെ പിന്നീട് ജാമ്യത്തില്‍ വിട്ടയച്ചു. പുതിയ ബസ്റ്റാന്റ് പരിസരത്തെ ഒരു ട്യൂഷന്‍ സെന്ററില്‍ പഠിക്കുന്ന പ്ലസ്ടു വിദ്യാര്‍ഥിനിയെ ഈ സംഘം നിരന്തരമായി ശല്യം ചെയ്യുന്നതായി പരാതിയുണ്ടായിരുന്നു. ഇത് ചോദ്യം ചെയ്ത പെണ്‍കുട്ടിയുടെ സഹോദരനെയും ഈ സംഘം മര്‍ദ്ദിച്ചു.തുടര്‍ന്ന് രക്ഷിതാക്കള്‍ പൊലിസില്‍ പരാതിപ്പെടുകയായിരുന്നു.