റിയാദ്: ലോകത്തെ ഏറ്റവും വലിയ എണ്ണയുല്‍പ്പാദക കമ്പനിയായ സഊദി അരാംകോ ഇന്ത്യയില്‍ രണ്ടാം ശാഖ തുറക്കാന്‍ ഒരുങ്ങുന്നു. ഇതിനായി സഊദി അരാംകോ അധികൃതര്‍ അടുത്തയാഴ്ച്ച ഇന്ത്യയില്‍ ചര്‍ച്ച നടത്തും. അടുത്ത ആഴ്ച്ചയോടെ അരാംകോ സി. ഇ.ഒ അമീന്‍ നാസര്‍ ഇന്ത്യയില്‍ പ്രധാനമന്ത്രി നരേന്ദ്ര മോദിയുമായി ചര്‍ച്ച നടത്തിയ ശേഷം അന്തിമ ചിത്രം തെളിയുമെന്നാണ് അറിയുന്നത്. നേരത്തെ ഒപെക് സമ്മേളനത്തില്‍ ഇന്ത്യയുടെ പെട്രോളിയം മന്ത്രി ധര്‍മേന്ദ്ര പ്രധാനുമായി ചര്‍ച്ച നടത്തിയിരുന്നു.

ലോകാടിസ്ഥാനത്തില്‍ എണ്ണ ഉപഭോഗത്തില്‍ മൂന്നാം സ്ഥാനമാണ് ഇന്ത്യക്കുള്ളത്. ഇതിനാല്‍ തന്നെ ഇന്ത്യയില്‍ പുതിയ ശാഖ തുറക്കുന്നതോടെ ഇന്ത്യയിലേക്കു എണ്ണ കയറ്റുമതി ചെയുന്ന ഏറ്റവും വലിയ രാജ്യമാവാന്‍ അരാംകോക്ക് കഴിയുമെന്നാണ് കണക്കു കൂട്ടുന്നത്. ഏഷ്യന്‍ മാര്‍ക്കറ്റില്‍ സഊദി അരാംകോയുടെ സാന്നിധ്യം ഇരട്ടിയാകുമെന്നും കരുതുന്നു. നിലവില്‍ ഇറാഖില്‍ നിന്നാണ് ഇന്ത്യ ഏറ്റവും കൂടുതല്‍ അസംസ്‌കൃത എണ്ണ ഇറക്കുമതി ചെയ്യുന്നത്. കര്‍ണാടകയിലെ മംഗലാപുരത്ത് സഊദി അരാംകോയുടെ ഉടമസ്ഥതയിലുള്ള എണ്ണ സംസ്‌കരണശാല പുരോഗമിക്കുകയാണ്.