ഹൈദരാബാദ്: മുസ്‌ലിം സ്ത്രീക്ക് വിവാഹമോചനം തേടുന്നതിന് ഭര്‍ത്താവിന്റെ സമ്മതമോ അനുമതിക്കായി കാരണമോ ആവശ്യമില്ലെന്ന് തെലങ്കാന ഹൈക്കോടതി. ഇസ്‌ലാമിക നിയമപ്രകാരം ഖുല്‍അ് വഴി ഭാര്യക്ക് ഏകപക്ഷീയമായി വിവാഹമോചനം നേടാമെന്നും ഭര്‍ത്താവിന്റെ അംഗീകാരമോ മതവിധി പറയുന്നവരുടെയോ (മുഫ്തിമാര്‍) ദാറുല്‍ ഖദാഅ് പോലുള്ള സംവിധാനങ്ങളുടെയോ ആവശ്യമില്ലെന്നും ജസ്റ്റിസ് മസൂമി ഭട്ടാചാര്യയും ജസ്റ്റിസ് ബി.ആര്‍ മധുസൂധന്‍ റാവുവും അടങ്ങുന്ന ഡിവിഷന്‍ ബെഞ്ച് വ്യക്തമാക്കി.
 
മുസ്‌ലിം വ്യക്തിനിയമപ്രകാരം വിവാഹം അവസാനിപ്പിക്കുന്നതില്‍ ജുഡീഷ്യറിയുടെ മുദ്ര പതിപ്പിക്കുക എന്നതാണ് കോടതിയുടെ ഏക പങ്ക്. ഖുല്‍അയുടെ അപേക്ഷ പരിശോധിക്കുക, അനുരഞ്ജന ശ്രമം ഉറപ്പാക്കുക, ബാധകമെങ്കില്‍ ഭാര്യ മഹ്ര് തിരികെ നല്‍കാന്‍ തയ്യാറാണോ എന്ന് സ്ഥിരീകരിക്കുക എന്നിവയില്‍ കുടുംബ കോടതിയുടെ പങ്ക് പരിമിതപ്പെടുത്തിയിരിക്കുന്നുവെന്നും കോടതി ചൂണ്ടിക്കാട്ടി.

ദമ്പതികള്‍ക്കിടയിലുണ്ടായ തര്‍ക്കങ്ങള്‍ക്ക് മധ്യസ്ഥത വഹിക്കുന്ന തെലങ്കാനയിലെ സദാഇ ഹഖ് ഷരാഇ കൗണ്‍സില്‍ എന്ന സംഘടനയെ സമീപിച്ചതിനെത്തുടര്‍ന്ന് യുവതിയുടെ ഖുല്‍അ് അപേക്ഷയെ എതിര്‍ത്ത് ഭര്‍ത്താവ് സമര്‍പ്പിച്ച ഹരജി തള്ളിയാണ് ഹൈക്കോടതിയുടെ വിധി. ഇത്തരം മതസംഘടനകള്‍ക്ക് ഉപദേശം നല്‍കാന്‍ മാത്രമെ അധികാരമുള്ളൂവെന്നും വിവാഹബന്ധം വേര്‍പ്പെടുത്താനുള്ള സ്ത്രീയുടെ സ്വതന്ത്രമായ അവകാശത്തെ മറികടക്കാന്‍ കഴിയില്ലെന്നും കോടതി നിരീക്ഷിച്ചു. ഇസ്‌ലാമില്‍ സ്ത്രീകള്‍ക്ക് ഖുല്‍ഇനുള്ള വ്യക്തമായ അവകാശം നല്‍കുന്നുണ്ടെന്ന് വിവാഹമോചനം സംബന്ധിച്ച് ഖുര്‍ആനിലെ രണ്ടാം അധ്യായത്തിലെ (സൂറത്തുല്‍ ബഖറ) 228, 229 സുക്തം ഉദ്ധരിച്ച് കോടതി ചൂണ്ടിക്കാട്ടി.

In a landmark ruling, the Telangana High Court affirms that Muslim women can unilaterally seek divorce through Khula without the consent of the husband or approval from religious bodies. The court emphasized women's independent right under Islamic law.