കോഴിക്കോട്: സര്‍ക്കാര്‍ ജീവനക്കാരുടെ ശമ്പള ബില്‍ തയാറാക്കി പ്രോസസ് ചെയ്യുന്ന സ്പാര്‍ക്ക് (സര്‍വീസ് പേറോള്‍ അഡ്മിനിസ്‌ട്രേറ്റീവ് റെപോസിറ്ററി ഫോര്‍ കേരള) സംവിധനത്തിലെ പരിഷ്‌കരണ നടപടികള്‍ ട്രഷറി ജീവനക്കാരെ ദുരിതത്തിലാക്കുന്നു.
കഴിഞ്ഞ ദിവസം ഗാന്ധിജയന്തി ദിനത്തിലും സംസ്ഥാനത്തെ ട്രഷറികള്‍ തുറന്നു പ്രവര്‍ത്തിച്ചിരുന്നു. ധനവകുപ്പിന്റെ പ്രത്യേക നിര്‍ദേശത്തെത്തുടര്‍ന്നാണ് ട്രഷറികള്‍ തുറന്നു പ്രവര്‍ത്തിച്ചത്. എന്നാല്‍ സാങ്കേതിക പ്രശ്‌നങ്ങള്‍ കൊണ്ട് ശമ്പളം ലഭിക്കേണ്ടവര്‍ക്കുണ്ടാകുന്ന ബുദ്ധിമുട്ട് പരിഹരിക്കാതെ അവധി ദിനത്തിലും ട്രഷറി തുറന്നു പ്രവര്‍ത്തിക്കുന്നത് കൊണ്ട് എന്ത് കാര്യമെന്നാണ് ജീവനക്കാര്‍ ചോദിക്കുന്നത്.
ദിവസങ്ങള്‍ക്ക് മുന്‍പാണ് സ്പാര്‍ക്ക് സംവിധാനത്തിന്റെ സോഫ്റ്റ്‌വെയര്‍ വിന്‍ഡോവ്‌സില്‍നിന്നു സ്വതന്ത്ര സോഫ്റ്റ്‌വെയറായ ലിനക്‌സിലേക്ക് മാറ്റുന്നതിനുള്ള നടപടികള്‍ ആരംഭിച്ചത്. സാമ്പത്തികമായുണ്ടാകുന്ന നേട്ടം അടിസ്ഥാനപ്പെടുത്തിയാണ് പുതിയ തീരുമാനം എന്നാണ് ലഭിക്കുന്ന വിവരം. എന്നാല്‍ ഏതെല്ലാം രീതിയിലുള്ള നേട്ടങ്ങളാണ് ഇതുകൊണ്ട് ഉണ്ടാവുകയെന്നത് ഇതിന് നേതൃത്വം നല്‍കുന്ന നാഷനല്‍ ഇന്‍ഫോമാറ്റിക് സെന്ററിലെ ഓരോ ജില്ലകളിലെയും ജീവനക്കാര്‍ക്ക് പോലും കൃത്യമായ ധാരണയില്ല.
പുതിയ സോഫ്റ്റ്‌വെയറിന് മുന്‍പുണ്ടായിരുന്നവയുമായി താരതമ്യം ചെയ്യുമ്പോള്‍ എത്രത്തോളം വിവരങ്ങള്‍ ശേഖരിച്ചുവയ്ക്കാനുള്ള സൗകകര്യമുണ്ടെന്ന കാര്യത്തിലുള്‍പ്പെടെ ആശങ്ക ഉയരുന്നുണ്ട്. ഉപഭോക്തക്കള്‍ക്ക് എത്രത്തോളം സൗകര്യപൂര്‍വം ഇടപെടാന്‍ കഴിയുമെന്നതിലും സംശയങ്ങള്‍ നിലനില്‍ക്കുകയാണ്.
തുടര്‍ച്ചയായ അവധി ദിനങ്ങള്‍ക്ക് ശേഷം ശമ്പളം വാങ്ങാനെത്തുന്ന ജീവനക്കാര്‍ക്ക് പുതിയ പരിഷ്‌കരണ നടപടികള്‍ ഉണ്ടാക്കുന്ന പൊല്ലാപ്പുകള്‍ ചില്ലറയല്ല. വേണ്ടത്ര മുന്‍കരുതലില്ലാതെ ഒറ്റ ഘട്ടത്തില്‍ തന്നെ നടപ്പാക്കിയതാണ് പ്രതിസന്ധി സൃഷ്ടിച്ചിരിക്കുന്നത്. ശമ്പള വിതരണ നടപടികള്‍ സാധാരണഗതിയിലെത്തുന്നതിന് കൂടുതല്‍ സമയമെടുക്കുമെന്നാണ് ലഭിക്കുന്ന വിവരം. സോഫ്റ്റ്‌വെയര്‍ മാറ്റം കൊണ്ട് ഉദ്ദേശിച്ച നേട്ടങ്ങള്‍ കൈവരിക്കാനാകുമോ എന്ന കാര്യം ഭാവിയില്‍ കണ്ടറിയണണെന്നാണ് ട്രഷറിയിലെ ഉദ്യോഗസ്ഥര്‍ പറയുന്നത്.