തൃശൂര്‍: ഓള്‍ ഇന്ത്യ യുനൈറ്റഡ് പെട്രോളിയം ഫ്രണ്ട് 13ന് ആഹ്വാനം ചെയ്ത പെട്രോള്‍ പമ്പ് പണിമുടക്ക് കേരളത്തില്‍ പൂര്‍ണാര്‍ഥത്തില്‍ വിജയിപ്പിക്കുമെന്ന് ഓള്‍ ഇന്ത്യ പെട്രോളിയം ഡീലേഴ്‌സ് അസോസിയേഷന്‍, കേരള ഫെഡറേഷന്‍ ഓഫ് പെട്രോളിയം ട്രേഡേഴ്‌സ് അസോസിയേഷന്‍ (കെ.എഫ്.പി.ടി.എ) ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.
പെട്രോളിയം ഡീലര്‍മാരുടെ മൂന്ന് ദേശീയ സംഘടനകള്‍ ചേര്‍ന്നതാണ് യുനൈറ്റഡ് പെട്രോളിയം ഫ്രണ്ട്. 12ന് അര്‍ധരാത്രി തുടങ്ങുന്ന സമരം 13ന് രാത്രി 12 വരെ നീണ്ടുനില്‍ക്കും. ഡീലര്‍മാര്‍ നടത്തുന്ന സംസ്ഥാനത്തെ രണ്ടായിരത്തോളം പമ്പുകളാണ് 24 മണിക്കൂര്‍ അടച്ചിടുക.
പെട്രോളിയം ഉല്‍പന്നങ്ങളുടെ വില ഏകീകരിക്കുക, വിപണി നിയന്ത്രണ ചട്ടത്തിനു കീഴില്‍ നിസാര കാര്യങ്ങള്‍ക്ക് ഡീലര്‍മാരുമായി ചര്‍ച്ച ചെയ്യാതെ കനത്ത പിഴ ചുമത്തുന്നതും വിതരണം നിര്‍ത്തുന്നതും അവസാനിപ്പിക്കുക തുടങ്ങിയ ആവശ്യങ്ങള്‍ ഉന്നയിച്ചാണ് സമരം. ആവശ്യങ്ങള്‍ നടപ്പാക്കിയില്ലെങ്കില്‍ 27ന് അഖിലേന്ത്യാ തലത്തില്‍ അനിശ്ചിതകാല സമരം ആരംഭിക്കും.