ദുബൈ: ആവേശകരമായ രണ്ടാം ക്രിക്കറ്റ് ടെസ്റ്റിലും പാകിസ്താനെ വീഴ്ത്തി ശ്രീലങ്ക രണ്ടു മത്സരങ്ങളുടെ ടെസ്റ്റ് പരമ്പര 2-0ന് സ്വന്തമാക്കി. 68 റണ്‍സിനാണ് ലങ്ക ജയം നേടിയത്. നേരത്തെ ശ്രീലങ്കയുടെ രണ്ടാമിന്നിങ്‌സ് 96 റണ്‍സില്‍ അവസാനിപ്പിച്ച പാകിസ്താന് 317 റണ്‍സായിരുന്നു ജയിക്കാനായി ആവശ്യമുണ്ടായിരുന്നത്.
എന്നാല്‍ സൂക്ഷ്മതയോടെ ബാറ്റു ചെയ്യുന്നതില്‍ പാക് താരങ്ങള്‍ പരാജയപ്പെട്ടതോടെ അവരുടെ ഇന്നിങ്‌സ് 248 റണ്‍സില്‍ അവസാനിക്കുകയായിരുന്നു. അഞ്ചു വിക്കറ്റെടുത്ത ദില്‍രുവാന്‍ പെരേരയാണ് പാകിസ്താനെ തകര്‍ത്തത്. ഹെറാത്ത് രണ്ടുവിക്കറ്റ് വീഴ്ത്തി. ആസാദ് ഷെഫീഖ്(112) സര്‍ഫ്രാസ് അഹമ്മദ്(68) എന്നിവര്‍ മാത്രമേ പാക് നിരയില്‍ മികച്ച രീതിയില്‍ കളിച്ചുള്ളൂ. അതേസമയം പരമ്പരയുടെയും മത്സരത്തിലെയും താരമായി കരുണരത്‌നയെ തെരഞ്ഞെടുത്തു.