മക്ക: ഹജ്ജ് തീര്‍ത്ഥാടകരുടെ സേവനത്തിനുള്ള മുത്വവ്വിഫുമാരുടെ ഓഫീസില്‍ ഉന്നത തസ്തികകളില്‍ മൂന്നു വനിതകളെ നിയമിച്ചു. തൊഴില്‍ മേഖലയില്‍ വനിതകള്‍ക്ക് കൂടുതല്‍ പ്രാധ്യാന്യം കൊടുക്കുന്നതിന്റെ ഭാഗമായാണ് ഉയര്‍ന്ന തസ്തികകളില്‍ വനിതകളെ നിയമിക്കുന്നത്.

സബാഹ് ഹുസ്സൈന്‍ ബൂസി, നവാല്‍ അബ്ദുള്ള, റീം സക്കരിയ സംസമി എന്നിവരെയാണ് നിയമിച്ചതെന്നു വക്താവ് അബ്ദുല്‍ ഹാദി അബ്ദുല്‍ ജലീല്‍ സംസമി അറിയിച്ചു. ഉന്നത തസ്തികയായ ഗവണ്‍മെന്റ് റിലേഷന്‍ ഓഫിസര്‍ തസ്തികകളിലേക്കാണ് നിയമനം. ഹജ്ജ് സേവനത്തില്‍ ഇവര്‍ കഴിവ് തെളിയിച്ചതിന്റെ അടിസ്ഥാനത്തിലാണ് ഉയര്‍ന്ന തസ്തികകളിലേക്കുള്ള ഇവരുടെ നിയമനം.