റിയാദ്: സഊദിയില്‍ സ്ത്രീകളുടെ വസ്ത്രങ്ങള്‍ വില്‍ക്കുന്ന സ്ഥാപനങ്ങളിലെ വനിതാ വല്‍ക്കരണത്തിന്റെ അടുത്ത ഘട്ടം അടുത്തയാഴ്ച്ച മുതല്‍ തുടങ്ങുമെന്ന് സഊദി തൊഴില്‍ സാമൂഹിക വികസന മന്ത്രാലയം വ്യക്തമാക്കി. വനിതാ വല്‍ക്കരണത്തിന്റെ മൂന്നാം ഘട്ടമാണ് ഇനി തുടങ്ങാനുള്ളത്. ഇതിന്റെ ഭാഗമായി ഒക്‌ടോബര്‍ 21 മുതല്‍ സ്ത്രീകള്‍ക്കായുള്ള കടകളില്‍ വനിതാ വല്‍ക്കരണം ശക്തമാക്കും. സ്ത്രീകള്‍ക്കായുള്ള സുഗന്ധദ്രവ്യങ്ങള്‍, ചെരിപ്പുകള്‍, ബാഗുകള്‍, സോക്‌സുകള്‍, റെഡിമെയ്ഡ് വസ്ത്രങ്ങള്‍, തുണിത്തരങ്ങള്‍ എന്നിവ വില്‍ക്കുന്ന കടകളിലാണ് വനിതാവല്‍കരണം നടപ്പാക്കുക.

കൂടാതെ, വിവിധ സ്ഥാപനങ്ങളിലെ സ്ത്രീകള്‍ക്കാവശ്യമായ ഉല്‍പന്നങ്ങല്‍ വില്‍ക്കുന്ന വിഭാഗങ്ങളിലും മൂന്നാം ഘട്ടത്തോടെ വനിതകളെ നിയമിക്കും. ജോലിക്കാരുടെ സ്വകാര്യത, സ്വാതന്ത്ര്യം, വിശ്രമം, പ്രാര്‍ഥന എന്നിവക്കുള്ള സൗകര്യം ഒരുക്കിയ ശേഷമാകും നിയമനം. പൂര്‍ണമായും സ്വദേശികള്‍ക്കാണ് അവസരം. അബായകള്‍, കല്യാണ വസ്ത്രങ്ങള്‍, മഫ്ത തുടങ്ങിയ വസ്ത്രങ്ങള്‍ വില്‍ക്കുന്ന കടകളിലും ഈ ഘട്ടത്തില്‍ വനിതാവല്‍ക്കരണം ഉണ്ടാകും. കൂടാതെ മാളുകളിലെ ഫാര്‍മസികളില്‍ സ്ത്രീകള്‍ക്കായുള്ള മേഖലകളിലും വനിതകളെ നിയമിക്കും.

വിഷന്‍ 2030 സൗദി വനിതകള്‍ക്ക് പത്ത് ലക്ഷം തൊഴിലവസരം സൃഷ്ടിക്കുകയാണ് അധികൃതരുടെ ലക്ഷ്യം. ഐക്യരാഷ്ട്രസഭയിയില്‍ വിളിച്ചു ചേര്‍ത്ത പ്രത്യേക സമ്മേളനത്തില്‍ സഊദി പ്രതിനിധി ഫൗസ അല്‍മഹീദ് ആണ് ഇക്കാര്യം വ്യക്തമാക്കിയത്. ഇസ്‌ലാമിക ശരീഅത്ത് ആവശ്യമായ നിയമപരിരക്ഷയും സുരക്ഷിതത്വവും ഉറപ്പുവരുത്തിയായിരിക്കും സ്ത്രീകള്‍ക്ക് തൊഴിലവസരങ്ങള്‍ നല്‍കുക. ബിരുദധാരികളായ വനിതകള്‍ക്ക് തൊഴിലിന് ആവശ്യമായ പരിശീലനമുണ്ടാകും. ബിരുദം നേടാത്തവര്‍ക്ക് ആവശ്യമായ വിദ്യാഭ്യാസം നേടാനും സഊദി അവസരം സൃഷ്ടിക്കുമെന്നും ഇവര്‍ പറഞ്ഞു. തൊഴില്‍ വിപണിയിലെ സ്ത്രീ സാന്നിധ്യം 22 ശതമാനമാനമാണിപ്പോള്‍. ഇത് 30 ശതമാനമാക്കുകയാണ് അധികൃതരുടെ ലക്ഷ്യം.