ന്യൂഡല്‍ഹി: കേരളത്തിലെ സി.പി.എം പ്രവര്‍ത്തകരുടെ കണ്ണുകള്‍ ചൂഴ്‌ന്നെടുക്കുമെന്ന് ബി.ജെ.പി ദേശീയ ജനറല്‍ സെക്രട്ടറിയും മുന്‍ ലോക്‌സഭ് എം.പിയുമായ സരോജ് പാണ്ഡെ. 

ഇനിയും ബി.ജെ.പി പ്രവര്‍ത്തകരുടെ നേര്‍ക്ക് കണ്ണു കാണിക്കാന്‍ സി.പി.എം പ്രവര്‍ത്തകര്‍ മുതിര്‍ന്നാല്‍ ആ കണ്ണ് അവരുടെ വീടുകളില്‍ കയറി ചൂഴ്‌ന്നെടുക്കുമെന്ന് അറിയിക്കാനാണ് ജനരക്ഷായാത്ര നടത്തുന്നതെന്ന് അവര്‍ തുറന്നടിച്ചു. സി.പി.എം ആക്രമണങ്ങളെ യാത്ര തുറന്ന് കാട്ടുമെന്നും സരോജ് പാണ്ഡെ പറഞ്ഞു. കുംഹാരിയില്‍ നടന്ന ഒരു പൊതു ചടങ്ങിന് ശേഷം മാധ്യമങ്ങളോട് സംസാരിക്കുകയായിരുന്നു അവര്‍.

കേരളത്തിലെ ഇടത് സര്‍ക്കാര്‍ ജനാധിപത്യ രീതിയില്‍ പ്രവര്‍ത്തിക്കണമെന്നും ഇല്ലെങ്കില്‍ സര്‍ക്കാരിനെ പിരിച്ചുവിടുമെന്നും മുന്‍ ദേശീയ മഹിള മോര്‍ച്ച നേതാവ് ഭീഷണി മുഴക്കി. കേരളവും, ബംഗാളും ജനാധിപത്യ രീതിയില്‍ പ്രവര്‍ത്തിക്കണമെന്നും അതിനെ ബി.ജെ.പി ബഹുമാനിക്കുമെന്നും അവര്‍ കൂട്ടിച്ചേര്‍ത്തു. ജനാധിപത്യത്തെ കൊല്ലുന്ന കേരള സര്‍ക്കാരിനെ കേന്ദ്രഭരണം ഉപയോഗിച്ച് പുറത്താക്കുമെന്ന് അവര്‍ മുന്നറിയിപ്പു നല്‍കി. അമിത് ഷാ ഉദ്ഘാടനം ചെയ്ത ഈ റാലി കേരളത്തിന്റെ ഭാവി മാറ്റിയെഴുതുമെന്നും സരോജ് പാണ്ഡെ പറഞ്ഞു.