തളിപ്പറമ്പ്: കീഴാറ്റൂര്‍ പ്രദേശവാസികളുടെ എതിര്‍പ്പിനെ തുടര്‍ന്ന് നിര്‍ദിഷ്ട ചുടല- കുറ്റിക്കോല്‍ ബൈപാസിന്റെ അലൈന്‍മെന്റ് മാറ്റുന്നു. പുതിയ നിര്‍ദേശം ജില്ലാ കലക്ടറുടെ സാന്നിധ്യത്തില്‍ നടന്ന യോഗത്തില്‍ ദേശീയപാതാ അധികൃതര്‍ അവതരിപ്പിച്ചു.
നേരത്തെയുള്ള അലൈന്‍മെന്റില്‍ 240 ഏക്കറോളം നെല്‍കൃഷി നശിക്കുമെങ്കില്‍ അല്‍പം കിഴക്കോട്ടു മാറിയുള്ള പുതിയ അലൈന്‍മെന്റില്‍ അഞ്ച് ഏക്കറോളം മാത്രമെ നെല്‍കൃഷി നശിക്കൂവെന്നാണ് അധികൃതരുടെ വിശദീകരണം. നേരത്തെ കീഴാറ്റൂരിലെ ഏക്കറുകളോളം വയല്‍ നികത്തി ബൈപാസ് നിര്‍മിക്കാനായിരുന്നു നീക്കം.
എന്നാല്‍, വയല്‍കിളികള്‍ എന്ന പേരിലുള്ള കൂട്ടായ്മയുടെ നേതൃത്വത്തില്‍ നാട്ടുകാര്‍ നടത്തിയ അനിശ്ചിതകാല സമരത്തെ തുടര്‍ന്ന് ഈ നീക്കത്തില്‍നിന്ന് അധികൃതര്‍ പിന്മാറുകയായിരുന്നു. തുടര്‍ന്ന് മന്ത്രി ജി. സുധാകരനാണ് ബൈപാസിന്റെ പുതിയ അലൈന്‍മെന്റ് തയാറാക്കുന്നതിനായി വിദഗ്ധ സംഘത്തെ നിയോഗിച്ചത്. ഇതിനെ തുടര്‍ന്നാണ് സമരം അവസാനിപ്പിച്ചത്. പ്രാദേശിക സി.പി.എമ്മിന്റെ നേതൃത്വത്തില്‍ നടന്ന സമരം സര്‍ക്കാരിനും പ്രതിസന്ധിയുണ്ടാക്കിയിരുന്നു.
കലക്ടറേറ്റില്‍ ചേര്‍ന്ന യോഗത്തില്‍ നെല്‍വയലും ചതുപ്പു നിലവും പരമാവധി ഒഴിവാക്കിക്കൊണ്ട് ബൈപാസ് നിര്‍മിക്കാനാണ് ധാരണയായത്. ആര്‍ക്കെങ്കിലും ആക്ഷേപമോ പരാതിയോ ഉണ്ടെങ്കില്‍ പി.ഡബ്ല്യു.ഡി വകുപ്പിനേയോ കലക്ടറേയോ സമീപിക്കാം. ജില്ലാ കലക്ടര്‍ മീര്‍ മുഹമ്മദലി, ജയിംസ് മാത്യു എം.എല്‍.എ, ദേശീയപാത വിഭാഗം ചീഫ് എന്‍ജിനീയര്‍ പ്രഭാകരന്‍, വയല്‍കിളി സമര നേതാവായ സുരേഷ് കീഴാറ്റൂര്‍ തുടങ്ങിയവര്‍ പങ്കെടുത്തു. സമരത്തിന്റെ വിജയമാണ് പുതിയ നിര്‍ദേശമെന്നും എങ്കിലും തൃപ്തരല്ലെന്നും സമര സമിതി നേതാവ് സുരേഷ് കീഴാറ്റൂര്‍ പറഞ്ഞു.
അതേസമയം, ചുടല-കുറ്റിക്കോല്‍ ബൈപാസിന്റെ റൂട്ട് മാറ്റവുമായി ബന്ധപ്പെട്ട് വിദഗ്ധ സംഘം കീഴാറ്റൂരിലെത്തി പരിശോധന നടത്തി. കീഴാറ്റൂര്‍ വയല്‍ ഒഴിവാക്കിയുള്ള പുതിയ അലൈന്‍മെന്റ് തയാറാക്കുന്നതിന്റെ ഭാഗമായാണ് വിദഗ്ധ സംഘമെത്തിയത്. ഇന്നലെ രാവിലെ എട്ടോടെ മാധ്യമങ്ങളെ ഒഴിവാക്കിയാണ് വിദഗ്ധ സംഘം പരിശോധനക്കെത്തിയത്.
സംഘം കീഴാറ്റൂര്‍ വയലിന്റെ കിഴക്ക് ഭാഗത്താണ് പരിശോധന നടത്തിയത്. ലക്ഷം വീട് കോളനി സ്ഥിതി ചെയ്യുന്ന ഈ ഭാഗത്ത് കൂടിയാണ് പുതിയ അലൈന്‍മെന്റ് തയാറാക്കുകയെന്നാണ് സൂചന. നിലവിലുള്ള ദേശീയപാത വികസിപ്പിക്കണമെന്നുള്ള നിര്‍ദേശം തള്ളിയാണ് ഇന്നലെ പരിശോധന നടത്തിയത്.
പുതിയ നിര്‍ദേശ പ്രകാരം വയല്‍ സംരക്ഷിക്കപ്പെടുമെങ്കിലും ഇതില്‍ വയല്‍ക്കിളികള്‍ സംതൃപ്തരല്ല. വിദഗ്ധ സംഘം ഇത് സംബന്ധിച്ച റിപ്പോര്‍ട്ട് അടുത്ത ദിവസം പൊതുമരാമത്ത് വകുപ്പ് മന്ത്രിക്ക് സമര്‍പ്പിക്കും.