HOME
DETAILS

മുഖം രക്ഷിക്കാന്‍ യു.പി സര്‍ക്കാര്‍; താജ്മഹല്‍ പൈതൃക കലണ്ടറില്‍

  
backup
October 19 2017 | 03:10 AM

national19-10-17-tajmahal-issue

ലക്നോ: താജ്മഹല്‍ വിവാദത്തില്‍ നിന്ന് തടിയൂരാനായി യു.പി സര്‍ക്കാറിന്റെ അവസാന ശ്രമം. താജ്മഹലിനെ പുതിയ കലണ്ടറില്‍ ഉള്‍പെടുത്തിയാണ് സര്‍ക്കാര്‍ മുഖം രക്ഷിക്കാന്‍ ശ്രമിക്കുന്നത്. പബ്ലിക് റിലേഷന്‍ ഡിപ്പാര്‍ട്ട്‌മെന്റ് പുറത്തിറക്കിയ പൈതൃക കലണ്ടറിലാണ് താജ്മഹലിനെ ഉള്‍പെടുത്തിയത്.

താജ്മഹലിനെതിരെ പാര്‍ട്ടി നേതാക്കള്‍ നടത്തിയ പ്രസ്താവനകളാണ് യോഗി സര്‍ക്കാറിനെ വെട്ടിലാക്കിയത്. താജ്മഹലിന്റെ ചിത്രത്തോടൊപ്പം യു.പി മുഖ്യമന്ത്രി യോഗി ആദിത്യനാഥിന്റെയും പ്രധാനമന്ത്രി നരേന്ദ്ര മോദിയുടെയും ഫോട്ടോയും ചേര്‍ത്തിട്ടുണ്ട്.

ഇത് കൂടാതെ ഗൊരഖ്പൂരിലെ ഗൊരഖ്‌നാഥ് ക്ഷേത്രവും കലണ്ടറില്‍ ഉള്‍പെടുത്തിയിട്ടുണ്ട്. ബനാറസിലെ കാശി വിശ്വനാഥ് ക്ഷേത്രം, ഝാന്‍സി കോട്ട, സര്‍നാത് തുടങ്ങിയ സുപ്രധാന സ്ഥലങ്ങളും കലണ്ടറിലുണ്ട്.

ബി.ജെ.പി എം.എല്‍.എ സംഗീത് സോമാണ് താജ്മഹലിനെതിരായ പ്രസ്താവനയുമായി രംഗത്തെത്തിയത്. ഇന്ത്യന്‍ സംസ്‌കാരത്തിനേറ്റ കളങ്കമാണ് താജ്മഹലെന്നായിരുന്നു സംഗീത് സോമിന്റെ പരാമര്‍ശം.

ഇത് ഏറെ പ്രതിഷേധത്തിനിടയാക്കിയിരുന്നു. ഇതിനു പുറമെ യോഗി ആദിത്യനാഥ് മന്ത്രിസഭ അധികാരമേറ്റ് ആറുമാസത്തിനുള്ളില്‍ പുറത്തിറക്കിയ ടൂറിസം കൈപുസ്തകത്തില്‍ താജ്മഹലിനെ ഉള്‍പെടുത്താത്തതും വിവാദമായിരുന്നു.

അതിനിടെ ഈ മാസം 26ന് താജ് സന്ദര്‍ശിക്കുമെന്ന് യു.പി മുഖ്യമന്ത്രി യോഗി ആദിത്യനാഥ് വ്യക്തമാക്കിയിട്ടുണ്ട്.
 



Comments (0)

Disclaimer: "The website reserves the right to moderate, edit, or remove any comments that violate the guidelines or terms of service."