ചെറുവത്തൂര്‍: പതിനായിരത്തോളം മദ്‌റസകളില്‍ ഒന്നാമതെത്തിയ ചന്തേരയുടെ സംസ്ഥാനതല അവാര്‍ഡ് നേട്ടം ജില്ലക്ക് അഭിമാനമായി. സമസ്ത കേരള ഇസ് ലാം മത വിദ്യാഭ്യാസ ബോര്‍ഡ് സംസ്ഥാന തലത്തില്‍ ഏര്‍പ്പെടുത്തിയ പ്രഥമ കോട്ടുമല ബാപ്പു മുസ് ലിയാര്‍ അവാര്‍ഡാണ് ചന്തേര ഹയാത്തുല്‍ ഇസ്‌ലാം മദ്‌റസയെ തേടിയെത്തിയത്.

ദീര്‍ഘവീക്ഷണത്തോടെ നടപ്പിലാക്കിയ വൈവിധ്യമാര്‍ന്ന പ്രവര്‍ത്തനങ്ങളിലൂടെയാണ് ഈ മദ്‌റസ അഭിമാനനേട്ടം കൈവരിച്ചത്. സമസ്ത വിദ്യാഭ്യാസ ബോര്‍ഡ് നിഷ്‌കര്‍ഷിച്ച രീതിയിലുള്ള ക്ലാസ് മുറികള്‍, സ്മാര്‍ട്ട് ക്ലാസ്, പൂര്‍ണ്ണ സജ്ജമായ ലൈബ്രറി, റീഡിംഗ് റൂം, കംപ്യൂട്ടര്‍ ലാബ്, കുറ്റമറ്റ ഓഫിസ് സംവിധാനം, ഉന്നതമായ പഠന നിലവാരം, പൊതു പരീക്ഷകളിലെ തിളക്കമാര്‍ന്ന വിജയം, കലാമേളകളിലെ തുടര്‍ച്ചയായ ഓവറോള്‍ ചാംപ്യന്‍പട്ടം എന്നിവയെല്ലാം അംഗീകാരത്തിലേക്കുള്ള ചുവടുവെപ്പായി. പഠന നിലവാരം മെച്ചപ്പെടുത്തുന്നതിന് എല്ലാ മാസവും അധ്യാപകരും മഹല്ല് കമ്മിറ്റി ഭാരവാഹികളും ഒന്നിച്ചിരുന്ന് നടത്തുന്ന ദഅവാ മീറ്റിങ്ങുകള്‍, മാസം തോറും നടത്തുന്ന പി.ടി.എ യോഗങ്ങള്‍ എന്നിവ മാതൃകാപരമായ പ്രവര്‍ത്തനങ്ങളായി വിലയിരുത്തി. വിദ്യാര്‍ഥികള്‍ക്ക് എല്‍.സി.ഡി പ്രൊജക്ടര്‍ ഉപയോഗിച്ച് നല്‍കുന്ന പ്രാക്ടിക്കല്‍ ക്ലാസുകള്‍ പഠനത്തെ ഹൈടെക് ആക്കി.

മദ്‌റസാ പഠനത്തോടൊപ്പം വിദ്യാര്‍ഥികള്‍ക്ക് ഹിസ്‌ബോട് കൂടിയ ഖുര്‍ആന്‍ ഹിഫഌ ക്ലാസുകളും നല്‍കിവരുന്നു. ശുചിത്വ കാര്യങ്ങള്‍ക്കും പ്രത്യേക പരിഗണനല്‍കുന്നു. ഏറ്റവും നല്ല മഹല്ലിനു ള്ള 'ബെസ്റ്റ് മഹല്ല് 'അവാര്‍ഡിലൂടെ പകര്‍ന്നു കിട്ടിയ ഊര്‍ജ്ജവുമായി മഹല്ല് ശാക്തീകരണത്തിന്റെ കര്‍മ്മ വഴികളിലൂടെ പുത്തന്‍ പാത തെളിയിച്ചു കൊണ്ട് മുന്നേറുന്ന ചന്തേര മുസ്‌ലിം ജമാഅത്ത് കമ്മിറ്റിക്ക് മറ്റൊരു പൊന്‍തൂവല്‍ കൂടിയായി ഈ നേട്ടം.

അടുത്തിടെയാണ് ചന്തേര ഇ മഹല്ല് സംവിധാനത്തിലേക്ക് മാറിയത്. ചേളാരിയില്‍ നടന്ന ചടങ്ങില്‍ പാണക്കാട് ഹൈദരാലി ശിഹാബ് തങ്ങളില്‍ നിന്നു ചന്തേര മുസ് ലിം ജമാത്ത് കമ്മറ്റി പ്രസിഡന്റ് ടി കെ പൂക്കോയ തങ്ങള്‍ അവാര്‍ഡ് ഏറ്റുവാങ്ങി. ജനറല്‍ സെക്രട്ടറി എ.പി.പി കുഞ്ഞഹമ്മദ്, മദ്‌റസ സദര്‍ ഷഫീഖ് തങ്ങള്‍, ടി.കെ സത്താര്‍ ഹാജി എന്നിവരും സംബന്ധിച്ചു. അവാര്‍ഡ് നേട്ടം ആഘോഷമാക്കി മാറ്റാനുള്ള തയാറെടുപ്പിലാണ് മഹല്ല് നിവാസികള്‍.