കരുവാരകുണ്ട്: പൊലിസിനെ ആക്രമിച്ച് കുഴല്‍പ്പണവുമായി കടക്കാന്‍ ശ്രമിച്ച രണ്ട് യുവാക്കള്‍ പിടിയില്‍. ഇവരില്‍ നിന്നും 1.19 കോടി രൂപയും പണം കടത്തിയ കാറും പിടിച്ചെടുത്തു. റോഡില്‍ വാഹനം വിലങ്ങനെയിട്ട് തടയാന്‍ ശ്രമിച്ച പൊലിസിനെ ആക്രമിച്ച സംഘത്തെ കീഴ്‌പ്പെടുത്തിയായിരുന്നു അറസ്റ്റ്. കോഴിക്കോട് ജില്ലയിലെ മടവൂര്‍ ആരാമ്പ്രം സ്വദേശി കരിപ്പൂര്‍ വീട്ടില്‍ റിയാസ്(27), കൊടുവള്ളി ചെട്ടിയന്‍കണ്ടിയില്‍ മുജീബ് (36) എന്നിവരെയാണ് കരുവാരകുണ്ട് പൊലിസ് അറസ്റ്റ് ചെയ്തത്.
നിലമ്പൂര്‍ - പെരിന്തല്‍മണ്ണ റൂട്ടില്‍ ഇരിങ്ങാട്ടിരി പാലത്തില്‍ ജീപ്പ് കുറുകെയിട്ട് പൊലിസ് ഇവരെ തടയുകയായിരുന്നു. വാഹനത്തിന്റെ താക്കോല്‍ പൊലിസ് ഊരിയെടുത്തതോടെ പ്രതികള്‍ അക്രമാസക്തരായി. ഡ്രൈവറായിരുന്ന റിയാസ് എസ്.ഐ ജ്യോതീന്ദ്രകുമാറിനെയും മുജീബ് മറ്റു പൊലിസുകാരെയും നേരിട്ടു. വാഹനത്തില്‍ കരുതിയിരുന്ന ഇരുമ്പു വടികള്‍ കൊണ്ടായിരുന്നു ആക്രമണം. എസ്.ഐ യുടെ ഇടത് കൈയില്‍ കടിച്ചു മുറിവേല്‍പ്പിച്ചു. എ.എസ്.ഐ. പി.അബ്ദുസ്സലാം, സി.പി.ഒ മാരായ സന്ദീപ്, അരുണ്‍ എന്നിവര്‍ക്കും പരുക്കേറ്റു. പൊലിസ് വാഹനത്തിന്റെ ചില്ലുകള്‍ റെയ്ന്‍ ഷേഡുകള്‍ സീറ്റുകള്‍ എന്നിവയും പ്രതികള്‍ നശിപ്പിച്ചു. തമിഴ്‌നാട്ടില്‍ നിന്ന് കൊടുവള്ളിയിലേക്ക് കൊണ്ടുപോകുകയായിരുന്നു പണമെന്ന് പൊലിസ് പറഞ്ഞു.