റായ്ബറേലി: ഉത്തര്‍പ്രദേശിലെ റായ്ബറേലിയില്‍ സ്‌ഫോടനം നടന്ന ഊഞ്ചഹാര്‍ തെര്‍മല്‍ പവര്‍ പ്ലാന്റ് കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി സന്ദര്‍ശിച്ചു. അപകടത്തില്‍ പരുക്കേറ്റവരെയും മരിച്ചവരുടെ കുടുംബങ്ങളെയും അദ്ദേഹം കണ്ടു.

കോണ്‍ഗ്രസ് അധ്യക്ഷ സോണിയ ഗാന്ധിയുടെ മണ്ഡലമായ റായ്ബറേലിയിലാണ് അപകടം നടന്ന തെര്‍മല്‍ പവര്‍ പ്ലാന്റ്.

കേന്ദ്ര ഊര്‍ജ്ജമന്ത്രി ആര്‍.കെ സിംഗുമായി രാഹുല്‍ കൂടിക്കാഴ്ച നടത്തി സ്ഥിതിഗതികള്‍ വിലയിരുത്തി.

തെര്‍മല്‍ പവര്‍ പ്ലാന്റിലുണ്ടായ സ്‌ഫോടനത്തില്‍ നടുക്കം രേഖപ്പെടുത്തിയ രാഹുല്‍ ഗാന്ധി കൊല്ലപ്പെട്ടവരുടെ ബന്ധുക്കളുടെ ദുഃഖത്തില്‍ പങ്കുചേരുന്നതായും അറിയിച്ചു.

ഇന്നലെ വൈകുന്നേരത്തോടെയുണ്ടായ അപകടത്തില്‍ 26 പേര്‍ മരിക്കുകയും നൂറിലേറെ പേര്‍ക്ക് പരുക്കേല്‍ക്കുകയും ചെയ്തിരുന്നു. പരുക്കേറ്റവരില്‍ പലരുടേയും നില ഗുരുതരമാണ്.