മുക്കം: ഗെയില്‍ പദ്ധതി ജനവാസ മേഖലയില്‍ നടപ്പാക്കുന്നതിനെതിരേ കോഴിക്കോട്-മലപ്പുറം ജില്ലാ അതിര്‍ത്തിയായ എരഞ്ഞിമാവില്‍ സമരം അടിച്ചൊതുക്കി പദ്ധതി നടപ്പാക്കാന്‍ സര്‍ക്കാര്‍ നീക്കം.

ഒരു മാസത്തോളമായി നടക്കുന്ന സമരത്തില്‍ പങ്കെടുത്ത മുഴുവന്‍ പേരെയും കേസില്‍ കുടുക്കി പിന്തിരിപ്പിക്കാനാണ് പൊലിസ് ശ്രമിക്കുന്നത്. ഇതിന്റെ ഭാഗമായി കഴിഞ്ഞ ദിവസങ്ങളില്‍ രജിസ്റ്റര്‍ ചെയ്ത അഞ്ചു കേസുകളിലായി കണ്ടാലറിയുന്ന 1200ഓളം പേര്‍ക്കെതിരേ വധശ്രമം, പൊലിസിന്റെ കൃത്യനിര്‍വഹണം തടസപ്പെടുത്തല്‍, സംഘം ചേര്‍ന്ന് അക്രമിക്കല്‍, പൊതുമുതല്‍ നശിപ്പിക്കല്‍ അടക്കമുള്ള വകുപ്പുകള്‍ ചേര്‍ത്തു കേസെടുത്തു.

[caption id="attachment_445367" align="alignleft" width="630"] ഓടിച്ചിട്ട് പിടികൂടിയ യുവാവിനെ പൊലിസ് അറസ്റ്റു ചെയ്ത് നീക്കുന്നു[/caption]

ഇന്നും പൊലിസ് പലരെയും ക്രൂരമായി മര്‍ദിച്ചിട്ടുണ്ട്. 250ഓളം വരുന്ന സ്‌പെഷല്‍ ടീം അടക്കമുള്ള പൊലിസ് സേനാംഗങ്ങളുടെ നേതൃത്വത്തിലാണ് ജനങ്ങളെ നേരിട്ടത്. കുട്ടികളെയും സ്ത്രീകളെയും പോലും വെറുതെവിട്ടില്ല. മാരകമായി പരുക്കേറ്റ നിരവധി പേരെ വിവിധ ആശുപത്രികളില്‍ പ്രവേശിപ്പിച്ചു.

പലര്‍ക്കെതിരേയും ക്രൂരമായാണ് പൊലിസ് പെരുമാറിയത്. യാത്രക്കാരായവരെയടക്കം പൊലിസ് അറസ്റ്റ് ചെയ്തിട്ടുണ്ട്. നിരവധി വിദ്യാര്‍ഥികളെയും പൊലിസ് കസ്റ്റഡിയിലെടുത്തു.

നെല്ലിക്കാപറമ്പ് മാട്ടുമുറി റോഡില്‍ ഓടി രക്ഷപ്പെടാന്‍ ശ്രമിച്ച സമരാനുകൂലിയെ പൊലിസ് പിന്തുടര്‍ന്നു പിടികൂടി. ഇത്തരത്തില്‍ 20 ഓളം പേരെ പൊലിസ് ഓടിച്ചിട്ടു പിടിക്കുകയായിരുന്നു. നെല്ലിക്കാപറമ്പിലെ വീടുകളില്‍ കയറി പൊലിസ് അതിക്രമം നടത്തിയതായും പരാതിയുണ്ട്. സമരക്കാര്‍ ഓടിക്കയറിയെന്ന് ആരോപിച്ച് ആദംപടി യു.എ മുനീറിന്റെ വീട്ടില്‍ പൊലിസ് അതിക്രമിച്ചു കയറി. അകത്തുനിന്ന് കുറ്റിയിട്ട വാതില്‍ ചവിട്ടിപ്പൊളിക്കാന്‍ ശ്രമിച്ചു. മുന്‍വശത്ത് ഉണ്ടായിരുന്ന മുനീറിന്റെ സഹോദരന്റെ മകന്‍ നബീലിനെ മര്‍ദിക്കുകയും കസ്റ്റഡിയിലെടുക്കുകയും ചെയ്തു.

വീടിന്റെ ജനല്‍ ചില്ലുകള്‍ പൊലിസ് ലാത്തി കൊണ്ടടിച്ച് തകര്‍ത്തിട്ടുമുണ്ട്. ഈ സമയം തന്റെ മകനാണെന്ന് പറഞ്ഞ് നബീലിന്റെ പിതാവ് സലാം പൊലിസിനോട് കേണപേക്ഷിച്ചിട്ടും വിട്ടുനല്‍കാന്‍ തയാറായില്ല. പൊലിസ് ക്രൂരതയില്‍ ഭയന്ന് വിറച്ചതായി മുനീറിന്റെ ഭാര്യ പറഞ്ഞു. വലിയപറമ്പ് ഉള്‍പ്പെടെയുള്ള സ്ഥലങ്ങളിലും പൊലിസ് വീട്ടില്‍ കയറി അതിക്രമം കാണിച്ചതായും പരാതിയുണ്ട്. പൊലിസിന്റെ അതിക്രമങ്ങള്‍ പേടിച്ച് പലരും കുടുംബ വീടുകളിലേക്കടക്കം തല്‍ക്കാലത്തേക്ക് താമസം മാറിയതായാണ് വിവരം.

ഗെയില്‍ പദ്ധതി ജനവാസ മേഖലയില്‍നിന്ന് മാറ്റണമെന്നാവശ്യപ്പെട്ട് സമരം ചെയ്ത പ്രദേശവാസികളെ വേട്ടയാടിയ പൊലിസ് നടപടിയില്‍ പ്രതിഷേധിച്ച് തിരുവമ്പാടി നിയോജക മണ്ഡലത്തില്‍ യു.ഡി.എഫ് നടത്തിയ ഹര്‍ത്താല്‍ പൂര്‍ണമായിരുന്നു. ഹര്‍ത്താലിനോടനുബന്ധിച്ച് തിരുവമ്പാടിയില്‍ യു.ഡി.എഫ് നടത്തിയ പ്രകടനത്തില്‍ വന്‍ ജനകീയ പങ്കാളിത്തമുണ്ടായി.

[caption id="attachment_445369" align="alignleft" width="630"]
സംസ്ഥാനപാതയിലെ വലിയപറമ്പില്‍ സമരക്കാര്‍ ടയറുകളും മരങ്ങളും കൂട്ടിയിട്ട് കത്തിച്ച് ഗതാഗതം സ്തംഭിപ്പിച്ചപ്പോള്‍[/caption]

വ്യാപാര സ്ഥാപനങ്ങള്‍ അടഞ്ഞുകിടന്നു. തിരുവമ്പാടി കെ.എസ്.ആര്‍.ടി.സി സബ് ഡിപ്പോയില്‍നിന്ന് ബസുകള്‍ സര്‍വിസ് നടത്തിയില്ല. വ്യാപാരികള്‍ പൂര്‍ണമായും ഹര്‍ത്താലുമായി സഹകരിച്ചു. പൊതുവേ സമധാനപരമായിരുന്നു. ഇരുചക്രവാഹനങ്ങളും ചില സ്വകാര്യ വാഹനങ്ങളും മാത്രമാണ് നിരത്തിലിറങ്ങിയത്. തിരുവമ്പാടി, കൂടരഞ്ഞി, കോടഞ്ചേരി പഞ്ചായത്തുകളിലെ സര്‍ക്കാര്‍ സ്ഥാപനങ്ങളും വിദ്യാഭ്യാസ സ്ഥാപനങ്ങളും തുറന്നില്ല. മലയോര പഞ്ചായത്തുകളില്‍ യു.ഡി.എഫ് പ്രതിഷേധ പ്രകടനം നടത്തി.

---