പാരിസ്: ഇംഗ്ലീഷ് കരുത്തരായ ആഴ്‌സണല്‍ യുവേഫ യൂറോപ്പ ലീഗ് പോരാട്ടത്തിന്റെ നോക്കൗട്ടിലേക്ക് മുന്നേറി. ക്രവേന സ്വസ്ദക്കെതിരേ സ്വന്തം തട്ടകത്തില്‍ അരങ്ങേറിയ പോരാട്ടത്തില്‍ ഗോള്‍രഹിത സമനില വഴങ്ങേണ്ടി വന്നെങ്കിലും പീരങ്കിപ്പട മുന്‍ വിജയങ്ങളുടെ ബലത്തില്‍ സുരക്ഷിതരായി തന്നെ അവസാന 32ല്‍ എത്തി. അതേസമയം ഇംഗ്ലീഷ് ടീം എവര്‍ട്ടന്‍ ലീഗില്‍ നിന്ന് പുറത്തായി. ഫ്രഞ്ച് ടീം ഒളിംപിക് ലിയോണിനോട് 3-0ത്തിന് പരാജയപ്പെട്ടാണ് ഇംഗ്ലീഷ് പ്രീമിയര്‍ ലീഗില്‍ മോശം ഫോമിലൂടെ കടന്നുപോകുന്ന എവര്‍ട്ടന് യൂറോപ്പ ലീഗിലും പ്രതീക്ഷ അവസാനിപ്പിക്കേണ്ടി വന്നത്.
മറ്റ് മത്സരങ്ങളില്‍ ലാസിയോ 1-0ത്തിന് നീസിനേയും കൊളോണ്‍ 5-2ന് ബെയ്റ്റിനേയും റയല്‍ സോസിഡാഡ് 3-0ത്തിന് വര്‍ഡറിനേയും പരാജയപ്പെടുത്തി. ഇറ്റാലിയന്‍ കരുത്തരായ എ.സി മിലാനെ ഏതന്‍സ് ഗോള്‍രഹിത സമനിലയില്‍ തളച്ചു. വിയ്യാറല്‍ 2-0ത്തിന് സ്ലാവിയ പ്രഹയെ പരാജയപ്പെടുത്തി.