ഡല്‍ഹി: ഡിസംബര്‍ 22 മുതല്‍ 24 വരെ ചെമ്മാട് ഹിദായ നഗരിയില്‍ നടക്കുന്ന ദാറുല്‍ഹുദാ ഇസ്‌ലാമിക് സര്‍വകലാശാലയുടെ ബിരുദദാന സമ്മേളനത്തിന്റെ ദേശീയ പ്രചാരണോദ്ഘാടനം ഇന്ന് ഡല്‍ഹിയില്‍ നടക്കും. വൈകിട്ട് നാലിന് ഡല്‍ഹി ജാമിഅ മില്ലിയ്യയില്‍ നടക്കുന്ന ദേശീയ പ്രചാരണോദ്ഘാടനവും വിദ്യാഭ്യാസ സെമിനാറും സകാത്ത് ഫൗണ്ടേഷന്‍ ഡയരക്ടര്‍ ഡോ. സഫര്‍ മഹ്മൂദ് ഉദ്ഘാടനം ചെയ്യും. ദാറുല്‍ഹുദാ വൈസ് ചാന്‍സിലര്‍ ഡോ. ബഹാഉദ്ദീന്‍ മുഹമ്മദ് നദ്‌വി അധ്യക്ഷത വഹിക്കും.
ജാമിഅ മില്ലിയ്യയിലെ ഇസ്‌ലാമിക് സ്റ്റഡീസ് ഡിപ്പാര്‍ട്ട്‌മെന്റുമായി സഹകരിച്ച് 'ഇന്ത്യയിലെ മദ്‌റസാ വിദ്യാഭ്യാസം പുതിയ സാധ്യതകള്‍ തേടുന്നു' എന്ന വിഷയത്തില്‍ നടക്കുന്ന സെമിനാറില്‍ പ്രമുഖര്‍ വിഷയമവതിരിപ്പിക്കും. ഇ.ടി.മുഹമ്മദ് ബഷീര്‍ എം.പി, ജാമിഅ മില്ലിയ്യ പ്രൊഫ. നശ്അത്ത് ഖുറൈശ്, പ്രൊഫ. ജുനൈദ് ഹാരിസ്, ജെ.എന്‍.യുവിലെ ഡോ. ആമിര്‍ അലി, അഹ്മദ് സിറാജുദ്ദീന്‍, അബ്ദുല്ല ഹുദവി എടച്ചലം എന്നിവര്‍ സംസാരിക്കും. ദാറുല്‍ഹുദായ്ക്ക് ഡല്‍ഹിയിലെ ബട്കല്‍ ഹൗസില്‍ തുറക്കുന്ന ആസ്ഥാന കേന്ദ്രത്തിന്റെ ഉദ്ഘാടനവും ഇന്ന് നടക്കും. വി.സി ഡോ. ബഹാഉദ്ദീന്‍ മുഹമ്മദ് നദ്‌വി ഉദ്ഘാടനം ചെയ്യും. ശക്കീല്‍ ഹുദവി കരിപ്പൂര്‍ പദ്ധതി വിശദീകരണം നടത്തും. ഡോ. യു.വി.കെ മുഹമ്മദ്, യു.ശാഫി ഹാജി ചെമ്മാട് സംബന്ധിക്കും.