ന്യൂഡല്‍ഹി: കഴിഞ്ഞ ഏതാനും ദിവസം മുന്‍പ് പാചക വാതകത്തിനും വിമാന ഇന്ധനത്തിനും വില വര്‍ധിപ്പിച്ചതോടെ ജനങ്ങള്‍ പ്രതിഷേധം കടുപ്പിച്ചെങ്കിലും വിലവര്‍ധനവിനെ ന്യായീകരിക്കുന്ന നിലപാടുമായാണ് ഇപ്പോഴും കേന്ദ്ര സര്‍ക്കാര്‍ മുന്നോട്ടുപോകുന്നത്.
ഏറ്റവും പുതിയ കണക്കുപ്രകാരം 16 മാസത്തിനിടയില്‍ 19 തവണയാണ് പാചക വാതകത്തിന് വിലവര്‍ധിപ്പിച്ചത്. ഓരോ മാസവും പാചക വാതകത്തിന് വിലവര്‍ധിപ്പിക്കാനുള്ള തീരുമാനം വന്നത് 2016 ജൂലൈ മുതലാണ്. വില വര്‍ധിപ്പിക്കുന്നതിനോടൊപ്പം കാലക്രമേണ സബ്‌സിഡി എടുത്തുകളയാനുമാണ് സര്‍ക്കാര്‍ നീക്കം നടത്തുന്നത്. കഴിഞ്ഞ ദിവസം സിലിണ്ടറിന് 4.50 രൂപയുടെ വര്‍ധനവാണ് വരുത്തിയത്. ഇതോടെ സബ്‌സിഡിയുള്ള സിലിണ്ടറിന് 495.69 രൂപയും സബ്‌സിഡിയില്ലാത്തതിന് 93 രൂപ യും വര്‍ധിപ്പിച്ച് 742 രൂപയിലെത്തി. ഇക്കഴിഞ്ഞ ഓഗസ്റ്റ് മുതല്‍ നാല് തവണയാണ് സിലിണ്ടറിന് വില വര്‍ധിപ്പിച്ചത്.
ഓരോ മാസവും പൊതുമേഖലാ എണ്ണക്കമ്പനികള്‍ പാചക വാതകത്തിന് വിലവര്‍ധിപ്പിക്കുമെന്ന് കേന്ദ്ര സര്‍ക്കാര്‍ പ്രഖ്യാപിച്ചിരുന്നു. അടുത്തവര്‍ഷം മാര്‍ച്ചിനുശേഷം സബ്‌സിഡി എടുത്തുകളയാനും തീരുമാനിച്ചിട്ടുണ്ട്. ഇപ്പോള്‍ വിമാന ഇന്ധനം കിലോ ലിറ്ററിന് ഡല്‍ഹിയില്‍ 54,143 രൂപയാണ് വില. കഴിഞ്ഞ ദിവസം 1,098 രൂപയുടെ വര്‍ധനവാണ് വരുത്തിയിരുന്നത്.
വിലവര്‍ധനവിനെതിരേ കടുത്ത പ്രതിഷേധവും ഉയരുന്നുണ്ട്. പൊള്ളയായ വാഗ്ദാനങ്ങള്‍ നിര്‍ത്തി രാജ്യത്തെ ജനങ്ങളുടെ പ്രയാസങ്ങള്‍ തിരിച്ചറിയാന്‍ സര്‍ക്കാര്‍ തയാറാകണമെന്ന് കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി ആവശ്യപ്പെട്ടു.