തിരൂരങ്ങാടി: കുണ്ടൂര്‍ പി.എം.എസ്.ടി കോളജില്‍ ജൂനിയര്‍, സീനിയര്‍ വിദ്യാര്‍ഥികള്‍ തമ്മിലുണ്ടായ സംഘട്ടനത്തില്‍ ഒന്‍പത് പേര്‍ക്ക് പരുക്ക്.
ഡിഗ്രി മൂന്നാം വര്‍ഷ വിദ്യാര്‍ഥികളായ പൂക്കിപ്പറമ്പ് പി.വൈ. സാലിഹ്(20), ചെമ്മാട് പി. നിയാസ് (20), താനൂര്‍ പൂഞ്ഞോളി ശരത് ലാല്‍ (20), ചെമ്മാട് സി.കെ നഗര്‍ വി.കെ ഫസല്‍ (20), വേങ്ങര എന്‍.ബഷീര്‍ (20), ഡിഗ്രി രണ്ടാം വര്‍ഷ വിദ്യാര്‍ഥികളായ കുണ്ടൂര്‍ അത്താണി സ്വദേശികളായ വളപ്പില്‍ നിസാമുദ്ധീന്‍ (19), മച്ചിഞ്ചേരി ഫക്‌റുദ്ധീന്‍ റാസി(19), കോട്ടയ്ക്കല്‍ പി.വി സച്ചിന്‍ (19), കൊടക്കല്ലിങ്ങല്‍ നെച്ചിക്കാടന്‍ അംജത്അലി (19) എന്നിവര്‍ക്കാണ് പരുക്കേറ്റത്. അംജത്അലിയെ കോഴിക്കോട് മെഡിക്കല്‍ കോളജിലും മറ്റുള്ളവരെ തിരൂരങ്ങാടി താലൂക്കാശുപത്രിയിലും പ്രവേശിപ്പിച്ചു. ഇന്നലെ ഉച്ചയ്ക്ക് 3.30നാണ് സംഭവം.
കോളജ് ക്യാംപസില്‍ വിദ്യാര്‍ഥികളുടെ വാഹനങ്ങള്‍ പാര്‍ക്ക് ചെയ്യുന്നത് സംബന്ധിച്ച് രണ്ട് ദിവസം മുന്‍പ് മുന്നൂറ് വിദ്യാര്‍ഥികളുടെ ഒപ്പുശേഖരണം നടത്തി സീനിയര്‍ വിദ്യാര്‍ഥികള്‍ കോളജ് അധികൃതര്‍ക്ക് നല്‍കാന്‍ തയ്യാറാക്കിയ മെമ്മോറാണ്ടം സംബന്ധിച്ച വിഷയമാണ് സംഘട്ടനത്തില്‍ കലാശിച്ചത്. ജൂനിയര്‍ വിദ്യാര്‍ഥികള്‍ മെമ്മോറാണ്ടം പരസ്യമായി കീറിക്കളഞ്ഞതായി സീനിയര്‍ വിദ്യാര്‍ഥികള്‍ കുറ്റപ്പെടുത്തി.അറിയാതെ കീറിയതാണെന്നും പകരം മറ്റൊന്ന് തയാറാക്കിത്തരാമെന്ന് പറഞ്ഞെങ്കിലും അവസരം നല്‍കാതെ സ്റ്റഡി ലീവില്‍ പോയ സീനിയര്‍ വിദ്യാര്‍ഥികള്‍ ക്യാംപസിലെത്തി ആക്രമിക്കുകയുമായിരുന്നുവെന്ന് ജൂനിയര്‍ വിദ്യാര്‍ഥികള്‍ പറഞ്ഞു.